سپیکر قومی اسمبلی اور ڈپٹی سپیکر کی سینیٹر شیری رحمان کی رہائش گاہ آمد، بیٹی ماروی خورشید ملک کے انتقال پر تعزیت اور فاتحہ خوانی کی

کراچی۔( نمائندہ خصوصی):سپیکر قومی اسمبلی سردار ایاز صادق اور ڈپٹی سپیکر سید غلام مصطفیٰ شاہ منگل کو یہاں سینیٹر شیری رحمان کی رہائش گاہ پر گئےاور ان کی بیٹی ماروی خورشید ملک کے انتقال پر تعزیت اور فاتحہ خوانی کی ۔ قومی اسمبلی سیکرٹریٹ کے مطابق سپیکر اور ڈپٹی سپیکر نے مرحومہ کی روح کے ایصال ثواب اور بلند ی درجات کےلیے دعا کی ۔اس موقع پر سردار ایاز صادق نے کہا کہ اکلوتی بیٹی کا اچانک انتقال آپ کےلیے بہت بڑا صدمہ ہے اور ہم آپ کے غم میں برابر کے شریک ہیں ،اللہ تعالیٰ آپ کو یہ پہاڑ جیسا غم اور صدمہ برداشت کرنے کی ہمت اور استقامت عطا فرمائے۔ انہوں نے کہا کہ بیٹی کی جدائی کے دکھ کو بیان کرنے کےلیے الفاظ نہیں ،اللہ تعالیٰ مرحومہ بیٹی کے درجات بلند فرمائے ۔ڈپٹی سپیکر غلام مصطفیٰ شاہ نے بھی سینیٹر شیری رحمان سے تعزیت کا اظہار کیا۔