پاکستان ریلویز،عیدالفطر کے ایام میں مسافر ٹرینوں سے ریکارڈ آمدن حاصل

لاہور( نمائندہ خصوصی)عیدالفطر کے ایام میں پاکستان ریلویز نے مسافر ٹرینوں سے ریکارڈ آمدن حاصل کی۔ترجمان کے مطابق پاکستان ریلویز نے عید کے تین دنوں کے دوران مسافر ٹرینوں سے ریکارڈ آمدن حاصل کی ہے،عید کے پہلے روز آمدن11 کروڑ روپے،دوسرے روز17 کروڑ روپے جبکہ تیسرے روز 20 کروڑ روپے سے زائد رہی۔مزید برآں گزشتہ ایک ہفتے کے دوران پاکستان ریلویز نے مسافر ٹرینوں سے مجموعی طور پر ایک ارب روپے سے زائد آمدن حاصل کی۔ترجمان نے کہا کہ اس حوالے سے وفاقی وزیر برائے ریلویز محمد حنیف عباسی نے اس کارکردگی کو مثبت پالیسیوں اور موثر انتظامی اقدامات کا نتیجہ قرار دیتے ہوئے انتظامیہ کو مبارکباد پیش کی ہے۔انہوں نے ہدایت کی کہ مسافروں کو مزید بہتر سہولیات کی فراہمی کیلئے اقدامات کو تیز کیا جائے۔وزیرِ ریلویز نے کہا کہ مسافروں کو معیاری سہولیات کی فراہمی اور ریلوے ٹریک کی مضبوطی اولین ترجیح ہے،ہم اس پر کام کر رہے ہیں۔انہوں نے مزید کہا کہ آئندہ تین سالوں میں کراچی تا روہڑی ریلوے ٹریک کو مکمل طور پر اپ گریڈ کر دیا جائے گا،جس سے نہ صرف سفر کا معیار بہتر ہوگا بلکہ ٹرینوں کی رفتار میں بھی نمایاں اضافہ ہوگا۔