بھارتی ریاست کیرالہ میں برڈ فلو کی وبا پھیل گئی، بیس ہزار پرندے تلف کرنے کا حکم

نئی دہلی۔( نمائندہ خصوصی):بھارت کی جنوبی ریاست کیرالہ میں برڈ فلو پھیلنے کے باعث 20,000 سے زیادہ پرندوں کو تلف کرنے کا حکم دےدیا گیا ہے۔ شنہوا کے مطابق یہ اقدام برڈ فلو سے متاثر ہونے والے کوزی کوڈا اور الاپپوزا اضلاع میں حکام کی طرف سے اٹھائے گئے روک تھام کے اقدامات کا حصہ ہے۔ رپورٹس میں کہا گیا ہے کہ کوزی کوڈ میں تقریباً 14,228 پرندے اور الاپوزا میں 5,961 پرندوں کو مارا جانا ہے۔ بھوپال میں نیشنل انسٹی ٹیوٹ آف ہائی سیکیورٹی اینیمل ڈیزیز کو بھیجے گئے نمونوں میں انتہائی پیتھوجینک ایویئن انفلوئنزا کی موجودگی کی تصدیق کے بعد یہ فیصلہ لیا گیا۔ ہفتہ کو شروع ہونے والی پرندے تلف کرنے کی کارروائیاں محکمہ حیوانات کی طرف سے تعینات ریپڈ ریسپانس ٹیموں کے ذریعے متاثرہ علاقوں کے ایک کلومیٹر کے دائرے میں انجام دی جائیں گی۔ حکام کے مطابق یہ بیماری اب تک صرف پرندوں میں ہی رپورٹ ہوئی ہے۔ تاہم، حکام نے عوام پر زور دیا ہے کہ وہ چوکس رہیں اور پرندوں کی کسی بھی غیر معمولی موت کی اطلاع قریبی ویٹرنری ہسپتال کو دیں۔