وزیراعظم شہباز شریف کی زیر صدارت اجلاس، نجی شعبے کی حوصلہ افزائی ، گھروں کی تعمیر کے لیے آسان قرضوں کے حوالے سے عملی اقدامات اٹھانے کی ہدایت

اسلام آباد۔:( نمائندہ خصوصی)وزیر اعظم محمد شہباز شریف نے کم آمدنی والے شہریوں کو گھر کی سہولت فراہم کرنے کے لیے نجی شعبے کی حوصلہ افزائی اور گھروں کی تعمیر کے لیے آسان قرضوں کو حکومتی ترجیح قرار دیتے ہوئے اس حوالے سے عملی اقدامات اٹھانے کی ہدایت کی ہے۔ وزیراعظم محمد شہباز شریف کی زیر صدارت وفاقی وزارت ہاؤسنگ و تعمیرات کے امور پر اجلاس بدھ کو یہاں وزیر اعظم ہاؤس میں منعقد ہوا جس میں وفاقی وزیر قانون و انصاف اعظم نذیر تارڑ ، وفاقی وزیر اقتصادی امور احد خان چیمہ ، وفاقی وزیر خزانہ و محصولات محمد اورنگزیب ، وفاقی وزیر ہاؤسنگ اینڈ ورکس ریاض پیرزادہ، وفاقی وزیر انفارمیشن ٹیکنالوجی و ٹیلی کام شزا فاطمہ ، وزیراعظم کے مشیر برائے بین الصوبائی روابط رانا ثناء اللہ خاں، وزیر مملکت برائے خزانہ و ریلوے بلال اظہر کیانی اور متعلقہ اعلیٰ سرکاری افسران نے شرکت کی۔وزیر اعظم آفس کے میڈیا ونگ کی طرف سے جاری بیان کے مطابق وزیر اعظم نے اجلاس سے خطاب کرتے ہوئے کہا کہ کم آمدنی والے طبقے کے لیے رہائش کی فراہمی، سستے گھروں کے منصوبے بشمول نجی شعبے کی حوصلہ افزائی اور عوامی سہولیات کی بہتری ہماری ترجیحات میں شامل ہے۔انہوں نے عام آدمی کو ہاؤس فنانس کی سہولت مؤثر انداز میں فراہم کرنے کیلئے عملی اقدامات اٹھانے کی ہدایت کی۔اجلاس میں وزارت ہاؤسنگ اینڈ ورکس کے سٹریٹجک روڈ میپ پر بریفنگ میں بتایا گیا کہ تعمیرات کے شعبے کے حوالے سے ٹیکس سٹرکچر میں اصلاحات کی جارہی ہیں، تعمیری شعبے کے لئے ٹیکس سٹینڈرڈائزیشن پر فیڈرل بورڈ آف ریونیو اور صوبوں کی مشاورت جاری ہے، ہاؤس مورگیج کے حوالے سے اصلاحات کے مسودے پر بھی مشاورت جاری ہے۔وزیر اعظم کو بتایا گیا کہ پبلک پرائیویٹ پارٹنرشپ کے تحت کم آمدن والوں کے لئے گھروں کی تعمیر کے حوالے سے لائحہ عمل تیار کیا جا رہا ہے، رئیل ا سٹیٹ اور ہاؤسنگ کے شعبوں کے ضابطہ کار کے حوالے سے ریئل اسٹیٹ ریگولیٹری اتھارٹی کا قیام عمل میں لایا جائے گا۔ ہاؤس فنانس کے حوالے سے رئیل اسٹیٹ انویسٹمنٹ ٹرسٹ پر وزارت خزانہ ، ایف بی آر ، سکیورٹیز اینڈ ایکسچینج کمیشن اور صوبے وزارت ہاؤسنگ کے ساتھ مل کر کام کر رہے ہیں۔