وزیر اعظم محمد شہباز شریف کی جمہوریہ آذربائیجان کے صدر الہام علیوف کوآذربائیجان کے برادر عوام کے ساتھ مکمل یکجہتی اور حمایت کی یقین دھانی ، دونوں رہنماؤں کا خطے میں کشیدگی میں کمی اور امن کی بحالی پر زور اور رابطے میں رہنے پر اتفاق

اسلام آباد۔( نمائندہ خصوصی):وزیر اعظم محمد شہباز شریف نے جمہوریہ آذربائیجان کے صدر الہام علیوف کوآذربائیجان کے برادر عوام کے ساتھ مکمل یکجہتی اور حمایت کا یقین دلایا ہےجبکہ دونوں رہنماؤں نےخطے میں کشیدگی میں کمی اور امن کی بحالی کی ضرورت پر زور دیا ہے اور رابطے میں رہنے پر اتفاق کیا ہے۔جمعہ کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف اورجمہوریہ آذربائیجان کے صدر نے ٹیلی فون پر تبادلہ خیال کیا۔گفتگو کے دوران وزیراعظم نے کل آذربائیجان کے ناخچیوان پر ہونے والے ڈرون حملوں کی سخت ترین الفاظ میں مذمت کی جس میں معصوم شہریوں کو نشانہ بنایا گیا،انہوں نے آذربائیجان کی قیادت کو یقین دلایا کہ پاکستان اس مشکل وقت میں آذربائیجان کے برادر عوام کے ساتھ مکمل یکجہتی اور حمایت میں کھڑا ہے۔وزیرِ اعظم نے صدر الہام علیوف کو ایران اور خلیج میں جاری بحران کے حوالے سے پاکستان کی سفارتی کوششوں سے آگاہ کیا۔صدر الہام علیوف نے وزیراعظم کا ٹیلی فونک رابطے پر شکریہ ادا کیا اور اس مشکل وقت میں پاکستانی عوام کے یکجہتی اور حمایت کے جذبات کو سراہا۔دونوں رہنماؤں نے خطے میں کشیدگی میں کمی اور امن کی بحالی کی ضرورت پر زور دیا اور رابطے میں رہنے پر اتفاق کیا۔