دہشت گردی کے خاتمے کے لیے کے پی کی حمایت ناگزیر ہے ، وزیر ڈاکٹر مصدق ملک

اسلام آباد۔( نمائندہ خصوصی):وفاقی وزیر برائے ماحولیاتی تبدیلی ڈاکٹر مصدق ملک نے کہا کہ صوبائی علاقوں سے دہشت گردی کے ناسور کے خاتمے کے لیے خیبر پختونخوا (کے پی) حکومت کی حمایت انتہائی اہم ہے۔ بدھ کو نجی ٹی وی چینل سے گفتگو کرتے ہوئے انہوں نے کہا کہ پاکستان تحریک انصاف (پی ٹی آئی) کی صوبائی حکومت کو دہشت گردی کے مکمل خاتمے کے لیے وفاقی حکومت سے تعاون کرنا چاہیے۔انہوں نے کہا کہ اپوزیشن کو بھی پارلیمنٹ میں اپنا کردار ادا کرنا چاہیے اور قومی مسائل پر بحث کرنی چاہیے۔اپوزیشن سے مذاکرات کے حوالے سے ایک سوال کے جواب میں ڈاکٹر مصدق ملک کہا کہ ہم نے متعدد مواقع پر پی ٹی آئی کی قیادت کو مذاکرات کی پیشکش کی، لیکن پارٹی کی قیادت مختلف گروہوں میں تقسیم ہے۔انہوں نے کہا کہ سیاسی مسائل کے حل کے لیے مذاکرات ہی واحد راستہ ہیں۔ غربت سے متعلق ایک سوال پر انہوں نے کہا کہ حکومت کی کوششوں کے باعث مہنگائی میں کمی آئی ہے۔ تاہم، انہوں نے اعتراف کیا کہ ملک کو مختلف چیلنجز کا سامنا ہے۔ ڈاکٹر مصدق ملک نے مزید کہا کہ ہم اجتماعی کوششوں کے ذریعے ان چیلنجز سے نمٹنے کے لیے پرعزم ہیں۔