یونیورسٹیاں مکالمے، تحقیق اور قومی تعمیر کا مرکز ہونی چاہئیں، تعلیمی عدم مساوات کا خاتمہ وقت کی ضرورت ہے۔ سپیکر پنجاب اسمبلی ملک محمد احمد خاں،

لاہور( نمائندہ خصوصی) اسپیکر پنجاب اسمبلی ملک محمد احمد خاں نے صوبائی وزیرِ صنعت و تجارت چودھری شافع حسین کے ہمراہ مکبر یونیورسٹی آف سائنس اینڈ ٹیکنالوجی گجرات کا باضابطہ افتتاح کر دیا۔ افتتاحی تقریب میں رانا جاوید اقبال، ممبران اسمبلی چوہدری عبداللہ یوسف، تشفین صفدر، راجہ اسلم خان، ڈاکٹر طارق سلیم اور چوہدری انصر ڈھول، پروفیسر عرفان احمد، افتخار احمد چیمہ سمیت طلبہ و طالبات، اساتذہ کرام اور مختلف سیاسی و سماجی شخصیات کی بڑی تعداد نےشرکت کی۔افتتاحی تقریب سے خطاب کرتے ہوئے سپیکر پنجاب اسمبلی ملک محمد احمد خاں نے کہا کہ یونیورسٹی محض ایک عمارت کا نام نہیں بلکہ یہ مختلف علوم کا مجموعہ اور فکری تربیت کا مرکز ہوتی ہے جہاں طلبہ کو سائنس، فلسفہ، سیاست، تحقیق اور عملی زندگی کے تقاضوں سے روشناس کرایا جاتا ہے۔ سپیکر نے یونیورسٹی کے جدید انفراسٹرکچر، تعلیمی بلاکس، اسپورٹس سہولیات، ہارس رائیڈنگ اور سوئمنگ جیسی سرگرمیوں کو سراہتے ہوئے کہا کہ ہمہ جہت تعلیمی ماحول نوجوانوں کی صلاحیتوں کو نکھارنے میں کلیدی کردار ادا کرتا ہے اور یہ ایک بڑی قومی خدمت ہے۔سپیکر ملک محمد احمد خاں نے کہا کہ یونیورسٹیاں مکالمے، برداشت اور اختلافِ رائے کے احترام کو فروغ دینے کا اہم ترین پلیٹ فارم ہوتی ہیں۔ تحقیق کے میدان میں مختلف نظریات سامنے آتے ہیں اور طلبہ کو کھلے ذہن کے ساتھ علم کے حصول اور سائنسی جستجو کو آگے بڑھانا چاہیے۔صوبائی وزیر صنعت و تجارت چوہدری شافع حسین نے تقریب سے خطاب کرتے ہوئے کہا کہ نگران حکومت سے پہلے والی حکومت نے ترقیاتی سکیموں کے نام پر صرف کمیشن کھائے۔ سابق حکومت چار سالوں میں ایک ہسپتال نہ بنا سکی جبکہ وزیر اعلیٰ مریم نواز شریف نے دو سالوں میں دو بڑے ہسپتال بنا دیے۔ صوبائی وزیر نے کہا کہ سابق حکومت نے گجرات کو ڈویژن بنانے کا اعلان تو کیا مگر عملی طور پر کچھ نہ کیا اور گجرات میں واسا کا دفتر تک نہ لا سکی۔ وزیر اعلیٰ مریم نواز شریف نے گجرات کی ترقیاتی سکیموں کے لیے فنڈز فراہم کیے جس کے باعث اربوں روپے کی لاگت سے منصوبوں پر تیزی سے کام جاری ہے۔صوبائی وزیر نے بتایا کہ سروس موڑ بریج میں ریلوے کے این او سی کے باعث کچھ تاخیر ہوئی تاہم ڈیڑھ ماہ میں اسے ٹریفک کے لیے کھول دیا جائے گا جبکہ 16 کروڑ روپے کی لاگت سے رحمان شہید روڈ تکمیل کے آخری مراحل میں ہے۔صوبائی وزیر نے کہا کہ مکبریونیورسٹی جدید علوم کے فروغ میں اپنا مؤثر کردار ادا کرے گی۔