راولپنڈی۔( نمائندہ خصوصی):پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے کہا ہے کہ خیبرپختونخوا میں دہشت گردی کے 80 فیصد واقعات کی بنیادی وجہ وہاں میسر ’’سازگار سیاسی ماحول‘‘ اور ’’کریمنل ٹیرر گٹھ جوڑ‘‘ ہے، بھارت کی سرپرستی میں افغانستان دہشت گردوں کی آماجگاہ بن چکا ہے جہاں سے ’’وار اکانومی‘‘ چلانے کے لئے دہشت گردی کو سپانسر کیا جا رہا ہے،ریاست اپنے ایک ایک بچے کے تحفظ کے لئے پرعزم ہے،خوارج کا اسلام سے کوئی تعلق نہیں اور اللہ کے حکم کے مطابق ان کا فتنہ ہر صورت ختم کیا جائے گا۔منگل کو یہاں پریس کانفرنس سے خطاب
کرتے ہوئے ترجمان پاک فوج نے سال 2025 کی سکیورٹی صورتحال کا جامع احاطہ کیا۔ انہوں نے بتایا کہ گزشتہ سال دہشت گردی کے 5 ہزار 397 واقعات ہوئے جبکہ سکیورٹی فورسز نے مجموعی طور پر 75 ہزار 175 انٹیلی جنس بیسڈ آپریشنز کئے جن کے نتیجے میں 2 ہزار 597 دہشت گرد جہنم واصل ہوئے جبکہ 1235 سکیورٹی اہلکاروں اور شہریوں نے جامِ شہادت نوش کیا۔ ان کارروائیوں میں سب سے زیادہ 58,778 آپریشنز بلوچستان اور 14,658 خیبرپختونخوا میں کئے گئے۔ڈی جی آئی ایس پی آر نے انکشاف کیا کہ شام سے اڑھائی ہزار غیر ملکی دہشت گرد افغانستان منتقل ہو چکے ہیں جبکہ امریکہ کا چھوڑا ہوا 7.2 ارب ڈالر کا جدید اسلحہ اب پاکستان کے خلاف استعمال ہو رہا ہے۔ انہوں نے کہا کہ افغان طالبان ٹی ٹی پی کو اپنی تنظیمی طرز پر تیار کر رہے ہیں۔ انہوں نے دو ٹوک الفاظ میں کہا کہ بھارت نے ’’آپریشن سندور‘‘ کے نام پر پاکستانی شہریوں کو نشانہ بنانے کی کوشش کی جس کی کالک ابھی تک اس کے منہ پر ہے جبکہ ’’معرکہ حق‘‘ میں بھارت کا منہ کالا کیا گیا۔ترجمان نے بتایا کہ اکتوبر 2025 میں جب
افغان طالبان رجیم نے پاکستانی پوسٹوں پر حملے کئے تو پاک فوج نے ہارڈ میسج دیتے ہوئے گھنٹوں میں درجنوں افغان پوسٹوں کو صفحہ ہستی سے مٹا دیا۔انہوں نے واضح کیا کہ گزشتہ سال کے 10 بڑے دہشت گردانہ حملوں میں ملوث تمام حملہ آور افغان شہری تھے اور سرحد بند کرنے سے ان واقعات میں واضح کمی آئی ہے۔لیفٹیننٹ جنرل احمد شریف نے بتایا کہ خوارج مساجد اور گھروں میں بیٹھ کر آرمڈ کواڈ کاپٹرز اور ڈرونز کا استعمال کر رہے ہیں اور خواتین و بچوں کو انسانی ڈھال بناتے ہیں جبکہ پاک فوج صرف دہشت گردوں اور ان کے سہولت کاروں کو نشانہ بناتی ہے۔انہوں نے اس بیانیے کو مسترد کر دیا کہ یہ صرف فوج کی جنگ ہے۔ انہوں نے کہا کہ یہ پاکستان کے بقا ء کی جنگ ہے جو طاقت سے جیتی جائے گی۔ترجمان نے کہا کہ نیشنل ایکشن پلان پر تمام سیاسی جماعتوں کا اتفاق ہے اور اس پر عملدرآمد ناگزیر ہے۔ انہوں نے بتایا کہ گزشتہ پانچ سالوں میں فورسز کی
استعداد کار میں اس قدر اضافہ ہوا ہے کہ اب ایک شہادت کے مقابلے میں دو دہشت گرد مارے جا رہے ہیں۔انہوں نے سوال کیا کہ جو لوگ آپریشن کی مخالفت کرتے ہیں یا کابل سے سکیورٹی کی بھیک مانگنے کی بات کرتے ہیں کیا ان کی ذات پاکستان کی سالمیت سے بڑی ہے؟
