اسلام آباد( نمائندہ خصوصی)قومی خبررساں ادارہ ایسوسی ایٹڈ پریس آف پاکستان (اے پی پی) نے نئے سال کا آغاز حقائق پر مبنی رپورٹنگ سے اپنی غیر متزلزل وابستگی کے عزم کے اعادہ کے ساتھ کیا ہے۔سال نوکے موقع پراے پی پی ہیڈکوارٹرمیں تقریب منعقد ہوئی، اے پی پی کے منیجنگ ڈائریکٹر عاصم کھچی اس موقع پرموجود تھے،اس موقع پر ڈائریکٹر نیوز شمائلہ عندلیب، ایگزیکٹو ڈائریکٹر سبین عثمان خٹک ، چیف رپورٹر عباس علی چوہان اور ادارے کے سینئر صحافی موجودتھے،اے پی پی کے سینئر صحافیوں نے منیجنگ ڈائریکٹر کو گلدستے پیش کیے اورانہیں سال نوکی مبارکبادی دی ۔
چیف رپورٹر عباس علی چوہان نے منیجنگ ڈائریکٹر کو رپورٹنگ سیکشن کی کارکردگی سے آگاہ کیا،انہوں نے کام کیلئے سازگارماحول، نمایاں کامیابیوں اور معیاری، مستند اور ذمہ دار صحافت کے لیے غیر متزلزل عزم پر روشنی ڈالی،اس موقع پرگفتگوکرتے ہوئے اے پی پی کے منیجنگ ڈائریکٹر عاصم کھچی نے اے پی پی کے صحافیوں اورسٹاف کونئے سال کی مبارکباددیتے ہوئے کہاکہ سال نوہمیں ماضی کی غلطیوں سے سبق سیکھتے ہوئے نئے عزم کے ساتھ آگے بڑھنے کاپیغام دے رہاہے ۔انہوں نے قومی خبررساں ادارے سے وابستہ صحافیوںکو اپنی تخلیقی صلاحیتوں کو مزید نکھارنے ، نظم و ضبط کو مضبوط کرنے اورحقائق پرمبنی خبریں دینے کی ہدایت کی ۔ڈیجیٹل دور کے تناظر میں مہارتوں میں اضافے پر زور دیتے ہوئے انہوں نے کہا موجودہ ڈیجیٹل چیلنجوں سے نمٹنے کیلئے کمپیو اورڈیجیٹل میڈیا سے منسلک تکنیکی صلاحیتوں کو بہتر بنانا ضروری ہے تاکہ زیادہ موثر اور تیز رفتاری سے کام کویقینی بنایاجاسکے ۔انہوں نے کہاکہ پاکستان کے نوجوانوں نے اپنی سائبر مہارتوں کا لوہا منوایا ہے اور اب ہمیں ان صلاحیتوں کوقومی خبررساں ادارہ اے پی پی کی کارکردگی میں مزیدبہتری لانے کیلئے استعمال کرنا ہے ۔ انہوں نے کہاکہ وہ اے پی پی کو مزید جدید، زیادہ منظم اور ذمہ دار و قابلِ اعتماد خبروں کی بروقت ترسیل میں تیز تر دیکھنے کے متمنی ہیں، اس موقع پرایم ڈی اے پی پی نے کیک بھی کاٹا۔
