راولپنڈی۔,( نمائندہ خصوصی):چیف آف آرمی سٹاف فیلڈ مارشل سید عاصم منیر نے قاہرہ میں اتحادیہ صدارتی محل میں مصر کے صدر عبدالفتاح السیسی سے ملاقات کی۔ملاقات کے دوران انہوں نے پاکستان اور مصر کے درمیان دیرینہ دوستی کا اعادہ کرتے 
ہوئے دوطرفہ تعلقات پر تبادلہ خیال کیا۔ہفتہ کوآئی ایس پی آر سے جاری بیان کے مطابق فیلڈ مارشل سید عاصم منیرنے خطے کے امن و استحکام میں کلیدی کردار پر مصری قیادت کی تعریف کی جب کہ صدر السیسی نے عالمی اور امت مسلمہ کے لیے اہمیت کے حامل معاملات میں پاکستان کے مثبت اور فعال کردار کو سراہا۔دونوں رہنمائوں نے باہمی سٹریٹجک مفادات کے معاملات پر رابطہ کاری کی اہمیت اور عوام سے عوام کے رابطوں کو مضبوط بنانے پر زور دیا۔ملاقات میں دوستانہ تعلقات کی 
مشترکہ تاریخ اور تمام شعبوں خاص طور پر سماجی و اقتصادی مشغولیت، ٹیکنالوجی اور سلامتی کے امورمیں تعاون کو مزید وسیع کرنے کی باہمی خواہش ظاہر کی گئی۔ملاقات گرمجوشی کے ساتھ اختتام پذیر ہوئی، دونوں فریقوں نے کہاکہ مضبوط اقتصادی اور سیکورٹی ڈائیلاگ پاکستان، مصر اور وسیع تر خطے میں امن، استحکام اور سلامتی میں اہم کردار ادا کرے گا۔
