اسلام آباد۔( نمائندہ خصوصی):وزیرِاعظم محمد شہباز شریف ملائیشیا کے وزیراعظم انور ابراہیم کی دعوت پر 5 سے 7 اکتوبر 2025ء تک ملائیشیا کا سرکاری دورہ کریں گے۔ ان کے ہمراہ ا اعلیٰ سطحی وفد بھی ہوگا جس میں نائب وزیرِاعظم و وزیرِ خارجہ، وفاقی وزراء اور سینئر سرکاری حکام شامل ہوں گے۔یہ دورہ پاکستان اور ملائیشیا کے درمیان دیرینہ اور مضبوط شراکت داری کا مظہر ہے جو باہمی احترام، مشترکہ مفادات اور مختلف شعبوں میں قریبی تعاون کی عکاسی کرتا ہے۔ہفتہ کو دفتر خارجہ سے جاری بیان کے مطابق وزیرِاعظم شہباز شریف اپنے ملائیشین ہم منصب کے ساتھ دوطرفہ مذاکرات کریں گے جن میں علاقائی و 
عالمی امور پر تبادلہ خیال کیا جائے گا۔ دونوں رہنما تجارت، اطلاعات و مواصلات ،آئی ٹی و ٹیلی کام ،حلال صنعت، سرمایہ کاری، تعلیم، توانائی، انفراسٹرکچر، ڈیجیٹل معیشت اور عوامی روابط سمیت مختلف شعبوں میں تعاون کو مزید فروغ دینے کے امکانات پر بھی غور کریں گے۔دورے کے دوران دونوں ممالک کے درمیان موجودہ اور نئے شعبوں میں تعاون سے متعلق معاہدوں اور مفاہمتی یادداشتوں (ایم او یوز) پر دستخط بھی کیے جانے کے امکانات ہیں ۔یہ دورہ پاکستان اور ملائیشیا کے تعلقات کو مزید مستحکم بنانے کے دونوں ممالک کے اس عزم کا اعادہ کرتا ہے کہ وہ امن، استحکام، تجارت و سرمایہ کاری اور پائیدار ترقی کے فروغ
کے لیے مشترکہ طور پر کام کرتے رہیں گے۔ وزیرِاعظم محمد شہباز شریف کا دورہ ملائیشیا دونوں ممالک کے درمیان موجود دوستی اور تعاون کی مضبوط بنیادوں کو مزید مستحکم اور وسیع کرے گا۔
وزیرِاعظم محمد شہباز شریف 5 سے 7 اکتوبر تک ملائیشیا کا سرکاری دورہ کریں گے، ترجمان دفتر خارجہ
