نیول چیف ایڈمرل نوید اشرف سے چیف آف سٹاف بحرین ڈیفنس فورس لیفٹیننٹ جنرل ذیاب بن صقر کی ملاقات، دفاعی تعلقات کے دائرہ کار کو مزید مضبوط بنانے کے عزم کا اعادہ

راولپنڈی۔(نمائندہ خصوصی ):سربراہ پاک بحریہ ایڈمرل نوید اشرف سے چیف آف سٹاف بحرین ڈیفنس فورس لیفٹیننٹ جنرل ذیاب بن صقر نے نیول ہیڈکوارٹرز میں ملاقات کی ہے اور پاکستان اور بحرین کے درمیان دفاعی تعلقات کے دائرہ کار کو مزید مضبوط بنانے کے عزم کا اعادہ کیاگیا ہے۔منگل کو آئی ایس پی آر سے جاری کردہ بیان کے مطابق ملاقات میں باہمی دلچسپی کے امور، خطے کی سکیورٹی صورتحال اور دو طرفہ تعاون پر تبادلہ خیال کیا گیا ۔نیول چیف نے ریجنل میری ٹائم سکیورٹی پٹرولز کے ذریعے خطے میں امن و سلامتی کے لیے پاک بحریہ کے اقدامات پر روشنی ڈالی۔چیف آف سٹاف بحرین ڈیفنس فورس نے خطے میں بحری سکیورٹی اور استحکام کے حوالے سے پاک بحریہ کی کاوشوں کو سراہا۔ملاقات میں پاکستان اور بحرین کے درمیان دفاعی تعلقات کے دائرہ کار کو مزید مضبوط بنانے کے عزم کا اعادہ کیا گیا۔چیف آف سٹاف بحرین ڈیفنس فورس کے حالیہ دورے سے دونوں ممالک بالخصوص مسلح افواج کے مابین تعلقات کو مزید فروغ ملے گا۔