وفاقی وزیر داخلہ محسن نقوی کا شمالی وزیر ستان میں پولیس چیک پوسٹ پر فتنہ الخوارج کے دہشت گردوں کا حملہ ناکام بنانے پر فورسز کو خراج تحسین

اسلام آباد(نمائندہ خصوصی )وفاقی وزیر داخلہ محسن نقوی نے شمالی وزیر ستان میں پولیس چیک پوسٹ پر فتنہ الخوارج کے دہشت گردوں کا حملہ ناکام بنانے پر فورسز کو خراج تحسین پیش کیا ہے۔اپنے بیان میں وزیر داخلہ محسن نقوی نے فتنہ الخوارج کے 3 حملہ آور دہشت گردوں کو جہنم واصل کرنے پر فورسز کی پیشہ وارانہ صلاحیتوں کو سراہا ۔انہوں نے کہا کہ فورسز نے بروقت کارروائی کرکے خوارجیوں کے ناپاک عزائم کو ناکام بنایا۔وزیر داخلہ محسن نقوی نے دہشت گردوں کا بہادری سے مقابلہ کرتے ہوئے جام شہادت نوش کرنے والے پولیس اہلکار نظام اللہ کو خراج عقیدت پیش کیا۔وزیر داخلہ محسن نقوی نے شہید اہلکار کے خاندان سے دلی ہمدردی اور تعزیت کا اظہار کیا۔ محسن نقوی نے کہا کہ شہید پولیس اہلکار نظام اللہ نے جرات کے ساتھ دہشت گردوں کا مقابلہ کیا، فتنہ الخوارج کے دہشت گردوں کے ناپاک عزائم خاک میں ملانے پر بہادر سپوتوں کو سلام پیش کرتے ہیں۔