وزیراعلیٰ مریم نواز شریف کا دورہ جاپان کا پہلا مصروف ترین دن،16 گھنٹے تک مصروف رہیں

لاہور( نمائندہ خصوصی) وزیراعلیٰ پنجاب مریم نوازشریف نے جاپان کے دورے میں پہلا انتہائی مصروف ترین دِن گزارا۔ پانچ روزہ دورے کے پہلے دن 16 گھنٹے تک مصروف رہیں۔ وزیراعلیٰ مریم نوازشریف نے صبح آٹھ بجے اپنے دورے کی سرگرمیوں کا آغاز کیا اور رات بارہ بجے تک مختلف جاپانی حکام کے ساتھ ترقیاتی منصوبوں سے متعلق امور پر گفتگو میں مصروف رہیں۔پہلے دِن وزیراعلیٰ مریم نوازشریف نے جاپان کے شہری ترقی کے مختلف اداروں کا دورہ کیا۔ صاف پانی، سیوریج، ویسٹ واٹر ٹریٹمنٹ، ماحولیات کی بہتری اور زہریلے کاربن سے عوام کو بچانے کے جاپانی حکومت کے طریقوں کی سٹڈی کی۔ بندرگاہ کے حامل تاریخی یوکو ہاما شہر کا جائزہ لیا کہ جاپان نے ساحل کے کنارے آباد اس صنعتی شہر کو جدید صنعتی شہر میں کیسے تبدیل کیا ہے۔ وزیراعلیٰ مریم نوازشریف لاہور اور پنجاب کے دیگر صنعتی شہروں کو جدید خطوط پر بنانے کے نکتہ نظر سے معلومات دریافت کرتی رہیں۔ وزیراعلیٰ مریم نواز نے قدیمی ”ریڈ برِک وئیر ہاؤس“کا بھی دورہ کیا اور محنت کش طبقے کے بچوں کو ہنر سکھانے کے مرکز کا بھی جائزہ لیا۔ وزیراعلیٰ مریم نوازشریف نے جاپان میں پاکستانی کمیونٹی کی بڑی تقریب میں بھی شرکت کی۔