کراچی( بیورو رپورٹ )
پاکستان کے 75ویں یوم آزادی کے موقع پر ایرانی قونصل خانہ کراچی میں تقریب کا انعقاد کیا گیا۔ پاکستان میں ایرانی قونصل جنرل حسن نوریان نے وزیر بلدیات سندھ سید ناصر حسین شاہ کا استقبال کیا۔ تقریب میں سید ناصر حسین شاہ، حسن نوریان سمیت دیگر شخصیات بھی موجود تھیں تقریب کا آغاز تلاوت قرآن پاک سے کیا گیا۔ پاکستان کی آزادی کے 75 سال مکمل ہونے اور پاکستان ایران دوستی کے نشان کے طور پر کراچی میٹروپولیٹن کارپوریش نے ایران قونصل خانے سے متصل پارک کا نام سلمان فارسی پارک رکھ دیا جس کا افتتاح وزیر بلدیات سید ناصر حسین شاہ نے کیا۔
اس موقع پر سید ناصر حسین شاہ نے سلمان فارسی پارک میں پودا بھی لگایا۔ ایرانی سفیر نے وزیر بلدیات اور سندھ حکومت کا شکریہ ادا کیا۔ سید ناصر حسین شاہ کا کہنا تھا کہ پاکستان ایران میں برادرانہ تعلقات ہیں جو دن بہ دن مضبوط سے مضبوط تر ہوتے جارہے ہیں۔ یہ پارک حضرت سلمان فارسیؐ کے نام سے منسوب کیا گیا ہے جو کہ جلیل القدر صحابی تھے۔ سیدناصرحسین شاہ کا مزید کہنا تھا کہ سندھ گرین منصوبے کے تحت سلمان فارسی پارک میں پودے بھی لگائے جائیں گے۔ وزیر بلدیات کا کہنا تھا کہ دونوں ممالک کے درمیان تجارتی، سفارتی، ثقافتی مماثلت ہے۔ ہم شکر گزار ہیں کہ ایرانی قونصل خانے نے پاکستان کے یوم آزادی کے موقع پر اس تقریب کا انعقاد کیا۔ تقریب کے اختتام پر ایران کے قونصل جنرل حسن نوریاں نے سید ناصر حسین شاہ کو یادگاری شیلڈ بھی پیش کی۔
