اسلام آباد۔( نمائندہ خصوصی):مسلم لیگ (ن) کی سینیٹر بشریٰ انجم بٹ نے کہا ہے کہ پاکستان کی عالمی پہچان راتوں رات نہیں بلکہ مسلسل سفارتی کوششوں اور قومی یکجہتی سے حاصل ہوئی ہے۔ انہوں نے اس بات پر زور دیا کہ اسلام آباد کا مضبوط امن پیغام امریکہ ایران مذاکرات کے کامیاب ہونے کے لئے کلیدی حیثیت رکھتا ہے، دنیا ایک پرامن حل کی امید رکھتی ہے۔ایران ۔ امریکا مذاکرات کے تاریخی موقع پر ہفتہ کو ایک مقامی میڈیا چینل سے خصوصی گفتگو کرتے ہوئے سینیٹر بشریٰ انجم بٹ نے مذاکرات کے میزبان کے طور پر پاکستان کے کردار پر فخر کا اظہار کرتے ہوئے اسے قوم کے لیے ایک اہم کامیابی قرار دیا۔انہوں نے
کہا کہ یہ موقع امن کے فروغ میں ملک کی برسوں کی سفارتی کوششوں اور قیادت کا ثبوت ہے۔ انہوں نے اس امید کا اظہار کیا کہ پوری دنیا کی طرح پاکستانی قوم اور اس کی قیادت مذاکرات کے مثبت نتائج کی کوششوں میں متحد رہے گی۔ انہوں نے اس طرح کے اہم سفارتی مذاکرات کی کامیابی کو یقینی بنانے کے لیے متحد رہنے کی اہمیت پر زور دیا۔بشریٰ انجم بٹ نے اس بات پر روشنی ڈالی کہ پاکستان نے یہ تاریخی لمحہ راتوں رات حاصل نہیں کیا بلکہ مسلسل کوششوں اور اللہ کی مدد سے یہ مقام حاصل کیا ہے۔انہوں نے مزید کہا کہ مسلح افواج کی کامیابیوں اور بہتر صلاحیتوں کے بعد اب ملک کی سفارتی کوششیں روشن مستقبل کی راہ ہموار کر رہی ہیں۔انہوں نے کہا کہ اس لمحے میں پاکستان کا اتحاد ملک کی طاقت کا ثبوت ہے، تمام اندرونی اختلافات کو پس پشت ڈال کر ہمیں اکٹھا ہونا ہے۔ انہوں نے زور دیا کہ ایک متحد نقطہ نظر عالمی سطح پر ملک کے بیانیے کی تعمیر نو کی کلید ہے۔ایک سوال کے جواب میں بشریٰ انجم بٹ نے پی ٹی آئی کی احتجاجی کال منسوخ کرنے کو بھی سراہا اور اس بات پر زور دیا کہ قوم فوج اور سیاسی قیادت کے پیچھے متحد ہے۔ انہوں نے مزید کہا کہ ایسے اہم لمحات میں اجتماعی تعاون کی اہمیت دو چند ہو جاتی ہے۔انہوں نے کہا کہ پاکستان کی سفارتی کوششوں کو عالمی سطح پر پذیرائی ملی ہے اور دو متحارب ممالک کو کامیابی کے ساتھ مذاکرات کی میز پر لانا پاکستان کی ایک قابل فخر کامیابی ہے۔
مذاکرات سے مثبت نتائج کی امید ہے،سینیٹر بشریٰ انجم بٹ
