پاکستان سعودی عرب کے ساتھ ہر شعبے میں تعاون کو مزید فروغ دینے کے لیے پُرعزم ہے، وزیراعظم شہبازشریف

اسلام آباد(نمائندہ خصوصی)::وزیر اعظم محمد شہباز شریف نے سعودی عرب کی طرف سے پاکستان کی مسلسل اقتصادی و مالی معاونت کو سراہتے ہوئے کہا ہے کہ پاکستان کے عوام اور حکومت ہر مشکل وقت میں اپنے سعودی بھائیوں اور بہنوں کے ساتھ شانہ بشانہ کھڑے رہے ہیں، پاکستان سعودی عرب کے ساتھ ہر شعبے میں تعاون کو مزید فروغ دینے کے لیے پُرعزم ہے، وہ سعودی عرب کے وزیر خزانہ محمد بن عبداللہ الجدعان سے گفتگو کر رہے تھے جنہوں نے جمعہ کو یہاں اپنے ایک روزہ دورۂ اسلام آباد کے دوران اس سے وزیراعظم ہاؤس میں ملاقات کی۔ وزیر اعظم آفس کے میڈیا ونگ کی طرف سے جاری بیان کے مطابق نائب وزیراعظم و وزیر خارجہ محمد اسحاق ڈار اور چیف آف ڈیفنس فورسز ، آرمی چیف فیلڈ مارشل سید عاصم منیر بھی ملاقات میں موجود تھے۔سعودی وزیر خزانہ کا خیرمقدم کرتے ہوئے وزیراعظم نے خادم الحرمین الشریفین، شاہ سلمان بن عبدالعزیز آل سعود، اور ولی عہد و وزیراعظم شہزادہ محمد بن سلمان بن عبدالعزیز آل سعود کے لیے اپنے احترام اور نیک تمناؤں کا اظہار کیا۔وزیراعظم نے ولی عہد شہزادہ محمد بن سلمان کے ساتھ اپنی حالیہ خوشگوار اور دوستانہ ٹیلیفونک گفتگو کو محبت سے یاد کیا۔ انہوں نے پاکستان کے لیے ولی عہد کی گہری محبت اور گزشتہ برسوں میں پاکستان کو سعودی عرب کی مسلسل اقتصادی و مالی معاونت کو سراہا، جس نے پاکستان کے معاشی استحکام میں اہم کردار ادا کیا ہے۔وزیراعظم نے اس امر کا اعادہ کیا کہ پاکستان کے عوام اور حکومت ہر مشکل وقت میں اپنے سعودی بھائیوں اور بہنوں کے ساتھ شانہ بشانہ کھڑے رہے ہیں، اور یہ دونوں ممالک کے درمیان ایک دائمی رشتہ ہے جو ولی عہد شہزادہ محمد بن سلمان کی سرپرستی میں مزید مضبوط ہوا ہے۔ وزیراعظم نے اس بات پر زور دیا کہ پاکستان سعودی عرب کے ساتھ تجارت، سرمایہ کاری اور اقتصادی ترقی سمیت ہر شعبے میں تعاون کو مزید فروغ دینے کے لیے پُرعزم ہے۔ سعودی وزیر خزانہ نے وزیراعظم کا شکریہ ادا کیا اور اس عزم کا اعادہ کیا کہ سعودی عرب، ولی عہد شہزادہ محمد بن سلمان کے وژن کے مطابق، پاکستان اور سعودی عرب کے درمیان دیرینہ، گہرے اور برادرانہ تعلقات کو مزید مضبوط بنائے گا۔