نوجوانوں کو زیادہ سے زیادہ مواقع فراہم کرنے کے لیے حکومت کے اقدامات کسی بھی طرح متاثر نہیں ہوں گے ، وزیر اعظم شہباز شریف کی چیئرمین پرائم منسٹر یوتھ پروگرام سے ملاقات میں گفتگو

اسلام آباد۔( نمائندہ خصوصی):وزیر اعظم محمد شہباز شریف نےخطے میں کشیدگی اور موجودہ معاشی دباؤ اور چیلنجز کے باوجود وزیر اعظم یوتھ پروگرام کے تحت نوجوانوں کی فلاح و بہبود کیلئے منصوبوں کو جاری رکھنے کی ہدایت کرتے ہوئے کہا ہے کہ نوجوان ہمارا مستقبل ہیں،انہیں زیادہ سے زیادہ مواقع فراہم کرنے کے لیے حکومت کے اقدامات کسی بھی طرح متاثر نہیں ہوں گے۔ وہ چیئرمین پرائم منسٹر یوتھ پروگرام رانا مشہود احمد خاں سے گفتگو کر رہے تھے جنہوں نے منگل کو یہاں ان سے ملاقات کی ۔ وزیراعظم آفس کے میڈیا ونگ کی طرف سے جاری بیان کے مطابق ملاقات میں چیئرمین یوتھ پروگرام نے وزیراعظم کو یوتھ پروگرام کے تحت مختلف منصوبوں کی پیشرفت کے حوالے سے آگاہ کیا۔ وزیراعظم نے یوتھ پروگرام کے تحت جاری منصوبوں پر کام کی رفتار تیز کرنے اور نوجوانوں کو زیادہ سے زیادہ مواقع فراہم کرنے کے لیے کوششوں میں مزید اضافہ کرنے کی ہدایت کرتے ہوئے کہا کہ نوجوان ہماری قوم کا مستقبل ہیں، انہیں ملازمت، تعلیم، تکنیکی تربیت اور دیگر مواقع فراہم کرنا حکومت پاکستان کی اولین ترجیحات میں شامل ہے، ہم نوجوانوں کو عالمی مارکیٹ میں بہترین افرادی قوت کے طور پر متعارف کرانے کے لیے کوشاں ہیں۔ انہوں نے واضح کیا کہ خطے میں کشیدگی اور معاشی صورتحال و دباؤ کے باعث نوجوانوں کی ترقی اور فلاح و بہبود کے منصوبے متاثر نہیں ہوں گے ۔