پی ٹی اے اور پاکستان پوسٹ کے مابین ڈیجیٹل روابط اور عوام کو موثر خدمات کی فراہمی کے پیش نظر مفاہمتی یادداشت پر دستخط

اسلام آباد( نمائندہ خصوصی):پاکستان ٹیلی کمیونیکیشن اتھارٹی (پی ٹی اے) اور پاکستان پوسٹ آفس ڈیپارٹمنٹ نے ایک مفاہمتی یادداشت (ایم او یو) پر دستخط پی ٹی اے ہیڈکوارٹرز میں کیے، جس کا مقصد پاکستان کے ڈیجیٹل ایکو سسٹم کے فروغ اور مربوط کمیونیکیشن انفراسٹرکچر کے ذریعے عوامی سہولیات کو مؤثر بنانا ہے۔منگل کوپاکستان ٹیلی کمیونیکیشن اتھارٹی سے جاری بیان کے مطابق اس مفاہمتی یادداشت کے ذریعے معلومات کے تبادلے، باہمی اشتراک اور ہم آہنگی کے فروغ کے لیے ایک مؤثر فریم ورک قائم کیا گیا ہے، تاکہ دونوں ادارے مل کر “ڈیجیٹل پاکستان” کے وژن کی تکمیل میں کردار ادا کر سکیں۔ اس اشتراک کے اہم شعبوں میں ڈیجیٹل پوسٹل سروسز، ای گورننس، سائبر سکیورٹی، انفراسٹرکچر کے مؤثر استعمال، استعداد کار میں اضافہ اور معلومات کا تبادلہ شامل ہیں۔چیئرمین پی ٹی اے، میجر جنرل (ریٹائرڈ) حفیظ الرحمٰن نے اس موقع پر کہا کہ پی ٹی اے پی ٹی اے اسٹریٹجک تعاون کے فروغ کے لیے پُرعزم ہے، جو ڈیجیٹل نظام کو مضبوط بنانے اور جدت کو فروغ دینے میں کلیدی کردار ادا کرتا ہے۔ انہوں نے اداروں کے مابین قریبی تعاون کی اہمیت پر بھی زور دیا۔ڈائریکٹر جنرل، پاکستان پوسٹ، سمیع اللہ خان نے پی ٹی اے کے فعال کردار کو سراہتے ہوئے پوسٹل سروسز کو ڈیجیٹل انضمام کے ذریعے جدید بنانے کے عزم کا اظہار کیا۔واضح رہے کہ یہ تعاون ایک مربوط اور ڈیجیٹل طور پر بااختیار پاکستان کی تشکیل میں اہم پیش رفت ثابت ہوگا۔