خاتون اول آصفہ بھٹو زرداری نے تین روزہ سالانہ فلاور شو:آرٹس، سائنس اور ثقافتی نمائش 2026 کا افتتاح کردیا، بختاور کیڈٹ کالج کے کیڈٹس نے مہمانِ خصوصی کو گارڈ آف آنر پیش کیا

اسلام آباد۔( نمائندہ خصوصی):خاتون اول اور رکن قومی اسمبلی بی بی آصفہ بھٹو زرداری نےصوبائی وزیرصحت ڈاکٹر عذرا فضل پیچوہو کے ہمراہ ایچ ایم کھوجا گارڈن نواب شاہ میں منعقدہ تین روزہ سالانہ فلاور شو: آرٹس، سائنس اور ثقافتی نمائش 2026 کا افتتاح کیا۔ ہفتے کو ایوان صدر کے پریس ونگ سے جاری بیان کے مطابق افتتاحی تقریب کے دوران بختاور کیڈٹ کالج کے کیڈٹس نے مہمانِ خصوصی کو گارڈ آف آنر پیش کیا جبکہ بچوں نے رنگا رنگ ٹیبلوز کے ذریعے خاتون اول بی بی آصفہ بھٹو زرداری کا پرتپاک استقبال کیا۔بعد ازاں خاتون اول اور صوبائی وزیرصحت نے بختاور کیڈٹ کالج اور دیگر شریک اداروں کی جانب سے قائم کئے گئے مختلف سٹالز کا دورہ کیا۔ بی بی آصفہ بھٹو زرداری نے شاہ جو رسالو کے سٹال کا بھی معائنہ کیا اور نمائش میں پیش کیے گئے موسمی، آرائشی اور نایاب اقسام کے پھولوں میں گہری دلچسپی ظاہر کی۔ سرکاری و نجی تعلیمی اداروں کی جانب سے لگائے گئے سٹالز اور دلکش ٹیبلوز شائقین کی خصوصی توجہ کا مرکز رہے۔ خاتونِ اول نے منتظمین کی کاوشوں کو سراہتے ہوئے کہا کہ اس طرح کی مثبت اور صحت مند سرگرمیاں نہ صرف ماحول کی خوبصورتی میں اضافہ کرتی ہیں بلکہ معاشرے میں ہم آہنگی اور خوشی کو بھی فروغ دیتی ہیں۔انہوں نے کہا کہ پھول قدرت کا حسین تحفہ ہیں جو محبت، امن اور تازگی کی علامت ہیں۔ انہوں نے کہا کہ عوام کو صحت مند تفریحی مواقع فراہم کرنا پاکستان پیپلز پارٹی کے وژن کا حصہ ہے۔ اس موقع پرثقافتی پروگرام بھی پیش کیا گیا جس میں بچوں نے ملی نغمے، ٹیبلوز اور دیگر فنی مظاہرے پیش کئے۔ تقریب میں رکن سندھ اسمبلی غلام قادر چانڈیو، کمشنر شہید بے نظیرآباد ڈویژن شاہمیر خان بھٹو، ڈپٹی کمشنر عبدالصمد نظامانی، ایڈیشنل ڈپٹی کمشنر صدام حسین میمن، پیپلز پارٹی کے ضلعی صدر محمد سلیم زرداری، میر محمد سیال، متعلقہ محکموں کے افسران اور منتخب نمائندوں نے شرکت کی۔ سالانہ فلاور شو: آرٹس، سائنس اور ثقافتی نمائش 2026 تین دن تک جاری رہے گی۔