پی ایس ایل کی پہلی باقاعدہ نیلامی ، نسیم شاہ وفہیم اشرف سب سے مہنگے کھلاڑی بن کر سامنے آئے

لاہور۔( نمائندہ خصوصی):پاکستان سپر لیگ (پی ایس ایل) کی تاریخ کی پہلی باقاعدہ نیلامی میں قومی فاسٹ بولر نسیم شاہ اور آل رائونڈر فہیم اشرف سب سے مہنگے کھلاڑی بن کر سامنے آئے۔نسیم شاہ کو راولپنڈی کی نئی فرنچائز نے 8 کروڑ 65 لاکھ پاکستانی روپے میں خریدا، وہ اسلام آباد یونائیٹڈ سے راولپنڈی منتقل ہوئے ہیں۔دوسری جانب فہیم اشرف 8 کروڑ 50 لاکھ روپے میں دوبارہ اسلام آباد یونائیٹڈ کا حصہ بن گئے۔نیلامی میں کئی معروف کھلاڑیوں پر بھی خطیر رقوم خرچ کی گئیں۔ ڈیوڈ وارنر 7 کروڑ 90 لاکھ روپے میں کراچی کنگز کو واپس مل گئے جبکہ فخر زمان کو لاہور قلندرز نے7 کروڑ 95 لاکھ روپے میں برقرار رکھا۔اسی طرح حارث رئوف7 کروڑ 60 لاکھ روپے میں لاہور کے ساتھ ہی رہے۔ ڈیرل مچل کو راولپنڈی نے 8 کروڑ 5 لاکھ روپے میں حاصل کیا جبکہ مارک چیپمین 7 کروڑ روپے میں اسلام آباد یونائیٹڈ کا حصہ بنے۔ایڈم زمپا 4 کروڑ 50 لاکھ روپے میں کراچی کنگز سے منسلک ہوئے۔ ریلی روسو 5 کروڑ 50 لاکھ روپے میں کوئٹہ گلیڈی ایٹرز کو مل گئے جبکہ حسن علی 4 کروڑ 76 لاکھ روپے میں کراچی واپس آگئے۔اسی طرح حیدرآباد ہیوسٹن کنگز مین نے پہلے ہی مارنس لبوشین کو براہ راست سائن کیا تھا اور صائم ایوب کو برقرار رکھا۔نیلامی میں انہوں نے امریکا کی نمائندگی کرنے والے پاکستانی نژاد کھلاڑی حماد اعظم اور شایان جہانگیر کو بھی ٹیم میں شامل کیا۔ لاہور نے نسیم شاہ کے چھوٹے بھائی عبید شاہ کو حاصل کیا جبکہ ہنین شاہ بعد میں حیدرآباد کنگز مین میں شامل ہو گئے۔انڈر 19 ایشیاء کپ میں شاندار کارکردگی دکھانے والے سمیع منہاس کے لیے بھی سخت مقابلہ دیکھنے میں آیا اور بالآخر اسلام آباد نے انہیں ایک کروڑ 90 لاکھ روپے میں خرید لیا تاہم فاسٹ بولر شاہنواز دہانی کو کوئی خریدار نہ مل سکا۔تقریبا آٹھ گھنٹے جاری رہنے والی اس نیلامی میں ٹیموں کو صرف چار کھلاڑی برقرار رکھنے کی اجازت تھی،جس کے باعث کئی بڑے نام نیلامی پول کا حصہ بنے اور لیگ میں ایک نئی سنسنی دیکھنے میں آئی۔