انوار کاکڑ نے گلگت بلتستان میں امراض قلب ہسپتال کی اوپی ڈی کا افتتاح کردیا

گلگت بلتستان(نمائندہ خصوصی) نگران وزیر اعظم انوار الحق کاکڑ نے کہا ہے کہ کسی کو معاشرہ یرغمال بنانے کی اجازت نہیں دیں گے، غلط فہمیوں کی بنیاد پر دوریوں کا خاتمہ ضروری ہے، ہم بولیاں لگانے نہیں ان کا گلا گھوٹنے آئے ہیں۔تفصیلات کے مطابق نگران وزیراعظم انوار الحق کاکڑ نے گلگت بلتستان کے پہلے اور واحد امراض قلب ہسپتال کی اوپی ڈی کا افتتاح کردیا۔اس موقع پر میڈیا سے گفتگو میں نگران وزیر اعظم نے کہا کہ کسی کو معاشرے کو یرغمال بنانے کی اجازت نہیں دیں گے،پاکستان میںکسی اور ملک کی ایجنسی نہیں صرف ملکی اداروں کا اثر ہو گا، کسی اور سے کوئی امید یا خوشی فہمی ہے تو وہ دور کر لے۔انہوں نے کہا کہ گلگت بلتستان کے مسائل آئینی طریقے سے حل کئے جائیں گے، آئینی سوالات کے جواب ڈھونڈ رہے ہیں،جوجلد عوام تک پہنچائیں گے۔ انہوں نے کہا کہ کسی نشست کے لئے بولی نہیں لگے،ہم بولیاں لگانے نہیں بولیوں کا گلا گھوٹنے آئے ہیں۔انہوں نے کہا کہ گلگت کے لوگوں کے لئے پیغام لے کر آیا ہوں کہ ایک دوسرے کے حقوق کا احترام کریں، دوریوں کو حکمت کے ساتھ دور کریں گے، گلگت میں بھائی چارہ یہاں کے سماج اور اقدار میں ہے۔انہوں نے کہا گلگت کے باسیوں نے بڑی محبت سے استقبال کیا، علاقہ مختلف رنگ ونسل کے لوگوں کا گلدستہ ہے۔انہوں نے کہا کہ گلگت کے لوگوں کے حوصلے پہاڑوں کی طرح ہیں، یہاں سیاحت کی غرض سے دنیا بھر سے لوگ آتے ہیں، علاقے کی ترقی کے لئے مختلف لوگوں سے ملاقاتیں بھی ہوئی ہیں۔انہوں نے کہا کہ ایک دوسرے کے حقوق کا احترام ضروری ہے، حقوق کے نفاد کی ذمہ داری ریاست کی ہے، اپنی ذمہ داری احسن طریقے سے نبھائیں گے جبکہ غلط فہمیوں کی بنیاد پر دوریوں کا خاتمہ ضروری ہے، ہم حکمت اور ہمت سے ان دوریوں کا خاتمہ کریں گے۔