لندن۔(نمائندہ خصوصی):برطانیہ میں امریکا کے زیر استعمال رائل ایئر فورس کےفضائی اڈے کے قریب احتجاج کے دوران سات افراد کو گرفتار کر لیا گیا۔الجزیرہ کے مطابق پولیس نے بتایا کہ پانچ مردوں اور دو خواتین کوحراست میں لیا گیا، جہاں وہ دیگر کارکنوں کے ہمراہ مبینہ طور پر امریکی طیاروں کے لیے اس اڈے کے استعمال کے خلاف احتجاج کر رہے تھے۔احتجاج کے منتظمین کا کہنا ہے کہ گرفتار افراد کے لباس پر ’’ہم نسل کشی کی مخالفت کرتے ہیں، ہم Palestine Action کی حمایت کرتے ہیں‘‘ کے جملے درج تھے۔پولیس نےبیان میں کہا کہ مظاہرین کو کالعدم تنظیم کی حمایت کے شبے میں گرفتار کیا گیا ہے اور قانون کے مطابق 
کارروائی کی جا رہی ہے۔برطانوی وزیراعظم کیئر اسٹارمر کی حکومت نے گزشتہ سال Palestine Action کو دہشت گرد تنظیم قرار دے کر اس پر پابندی عائد کی تھی، جس کے تحت اس کی حمایت یا رکنیت جرم ہے۔فروری میں ایک عدالت نے اس پابندی کو غیر متناسب قرار دیا تھا، تاہم حکومت کی اپیل کے باعث تاحال پابندی برقرار ہے۔منتظم گروپ کے مطابق اس تنظیم کی حمایت میں ہونے والے مظاہروں کے دوران اب تک 2700 سے زائد افراد کو گرفتار جبکہ سینکڑوں پر فردِ جرم عائد کی جا چکی ہے۔پولیس نےکہا کہ وہ موجودہ قانون پر عملدرآمد کے پابند ہیں۔
برطانیہ میں امریکا کے زیر استعمال آر اے ایف اڈے کے قریب احتجاج، 7 افراد گرفتار
