کابل :‏گوانتانامو جیل سے عمان منتقل کیے گئے 2 افغان قیدی رہا، آج وطن واپس پہنچ جائیں گے

کابل (مانیٹرنگ ڈیسک ) بیس سال سے امریکی جیل میں قید دو افغان شہریوں کو امارت اسلامیہ کی مسلسل کوششوں کے بعد رہا کر دیا گیا ہے اور آج وطن واپس پہنچ جائیں گے۔وزارت داخلہ کے ترجمان مفتی عبدالمتین قانع کے مطابق ان افراد میں ملا عبدالظاہر صابر اور عبدالکریم شامل ہیں۔
مفتی عبدالمتین قانع کی معلومات کے مطابق صوبہ لوگر کے مولوی عبدالظاہر صابر کو امریکی فورسز نے10 مئی 2002ء کو گرفتار کیا تھا اور صوبہ خوست سے تعلق رکھنے والے عبدالکریم کو پاکستانی حکومت نے 14 اگست 2002ء کو گرفتار کرکے امریکا کے حوالے کیا تھا۔ جس کے بعد انہیں گوانتانامو جیل منتقل کر دیا گیا۔ وزارت داخلہ کے ترجمان نے مزید کہا کہ دونوں افغان شہری 2017ء سے عمان میں حکومت کی کڑی نگرانی میں سفر کی پابندی کے ساتھ مقیم تھے۔ طے پایا ہے کہ یہ دونوں افغان شہری آج اپنے ملک واپس پہنچ جائیں گے۔