پرویز الہٰی کرپشن کیس،نیب نے محمد خان بھٹی کو بھی گرفتار کر لیا

لاہور (نمائندہ خصوصی) چودھری پرویزالہٰی کی مبینہ کرپشن کے اسکینڈل میں سابق وزیراعلیٰ پنجاب کے پرنسپل سیکرٹری محمد خان بھٹی کو بھی نیب نے گرفتار کرلیا۔میڈیارپورٹ کے مطابق محمد خان بھٹی کو تعمیراتی ٹھیکوں میں 1 ارب کی کرپشن کے الزام پر نیب لاہور نے گرفتار کیا، ملزم پر اختیارات کا ناجائز استعمال کرتے ہوئے گجرات و دیگر شہروں میں غیرقانونی بھرتیوں میں ملوث ہونے کا الزام ہے، دیگر ملزمان کیساتھ مہر عظمت حیات کو پنجاب ہائی وے ڈیپارٹمنٹ میں بطور ایکسیئن بھرتی کروا کر انہیں استعمال کیا۔ملزم محمد خان بھٹی نے شریک ملزموں کی ملی بھگت سے گجرات میں 116 ترقیاتی سکیمیں منظور کروائیں، ترقیاتی ٹھیکوں میں مبینہ طور پر 1 ارب سے زائد بٹورے گئے، من پسند کنٹریکٹر عظمت حیات کو ٹھیکوں میں رشوت کیلئے استعمال کیا گیا، ملزموں نے تعمیراتی کام شروع ہونے سے قبل ہی ٹھیکیداروں کو مکمل ادائیگیوں سے کمیشن وصول کیا۔نیب لاہور کے مطابق ٹھیکوں میں مبینہ کرپشن کی رقم چودھری پرویزالہٰی، مونس الہٰی اور محمد خان بھٹی کے ذاتی اکاونٹس میں منتقل ہوتی رہی، نیب لاہور نے تحقیقات کو آگے بڑھانے کیلئے ملزم محمد خان بھٹی کی سینٹرل جیل گوجرانوالہ سے کسٹڈی حاصل کر لی، ملزم کو جسمانی ریمانڈ کیلئے کل احتساب عدالت لاہور پیش کیا جائے گا۔