پنجاب کے مختلف شہروں میں موسلا دھار بارش ،جل تھل ایک ہو گیا

لاہور/گوجرانوالہ/فیصل آباد( نمائندگان )گوجرانوالہ، فیصل آباد، قصور، چونیاں سمیت وسطی پنجاب کے مختلف شہروں میں موسلا دھار بارش ہوئی جس سے جل تھل ایک ہو گیا ،گوجرانوالہ میں چند گھنٹوں کے دوران 138 ملی میٹر تک بارش سے سڑکیں اور انڈرپاسز تالاب بن گئے، پنجاب میں بارش کے باعث چھتیں گرنے کے مختلف واقعات میں ایک مزدور جاں بحق جبکہ پانچ زخمی ہوگئے ۔تفصیلات کے مطابق گوجرانوالہ ، فیصل آباد ، قصور اور چونیاں سمیت وسطی پنجاب کے مختلف شہروں میں موسلا دھار بارش ہوئی جس سے نشیبی علاقے زیر آب آ گئے ۔ گوجرانوالہ میں چند گھنٹے ہونے والی بارش سے کئی کئی فٹ پانی کھڑا ہو گیا ، نشیبی علاقے زیرآب آنے سے شہریوں کو شدید مشکلات کا سامنا کرنا پڑا۔ شاہراہوں پر بھی پانی جمع ہو گیا جس سے ٹریفک کی روانی سست روی کا شکار رہی ۔ڈسٹرکٹ ہیڈ کواٹر ہسپتال گوجرانوالہ کے سامنے بھی کئی فٹ پانی جمع ہو گیا جس کے باعث ڈاکٹروں، مریضوں اور تیمار دارں کو ہسپتال میں آمد و رفت میں دشواری کا سامنارہا۔ضلعی انتظامیہ گوجرانوالہ کے مطابق گوجرانوالہ کے علاقوں گھنٹہ گھر چوک میں سب سے زیادہ 138 ملی میٹر بارش ریکارڈ کی گئی ہے۔سیٹلائٹ ٹاون میں 105 ملی میٹر، ماڈل ٹاﺅن میں 82 ملی میٹر اور شیرانوالہ باغ میں 79 ملی میٹر بارش ہوئی ۔ قصور اورچونیاں میں موسلادھار بارشوں کے بعد گھٹنوں گھٹنوں پانی جمع ہو گیا، جبکہ کئی علاقوں میں پانی گھروں میں بھی داخل ہو گیا۔فیصل آباد میں جڑانوالہ روڈ پر بارش کے باعث پاور لومز فیکٹری کی چھت گرگئی، چھت کے ملبے تلے دب کر ایک مزدور جاں بحق جبکہ دو زخمی ہوگئے ۔واقعے کی اطلاع ملتے ہی ریسکیو ٹیمیں موقع پر پہنچ گئیں اور لاش و زخمیوں کو ہسپتال منتقل کردیا۔