لکی مروت: دہشت گردوں کا تھانے پر دستی بموں اور راکٹوں سے حملہ، 4 پولیس اہل کار شہید

لکی مروت(نمائندہ خصوصی) خیبر پختون خوا کے ضلع لکی مروت میں دہشت گردوں نے دستی بموں اور راکٹوں سے حملہ کر کے 4 پولیس اہل کاروں کو شہید کر دیا۔تفصیلات کے مطابق لکی مروت میں رات گئے تھانہ برگئی پر دستی بموں اور راکٹ لانچرز سے لیس دہشت گردوں نے حملہ کیا، جس میں 4 پولیس اہل کار شہید اور 4 زخمی ہو گئے۔پولیس حکام کے مطابق دہشت گردوں نے تھانے پر دو اطراف سے حملہ کیا، اہل کار دہشت گردوں کے حملہ کا جواب دیتے ہوئے شہید ہوئے، حملہ ہوتے ہی پولیس اور دہشت گردوں کے درمیان فائرنگ کا تبادلہ ہوا۔حملے کے بعد دہشت گرد فرار ہو گئے، جنھیں پکڑنے کے لیے پولیس کی بھاری نفری نے علاقے میں سرچ آپریشن شروع کر دیا ہےلکی مروت میں تھانے پر حملے میں شہید ہونے والے اہل کاروں میں ۔کانسٹیبل ابراہیم، عمران، خیر الرحمٰن اور سبز علی شامل ہیں، جب کہ زخمی اہل کاروں میں اے ایس آئی گل خان، کانسٹیبل بلقیاز، امیر نواز اور فرمان اللّٰہ شامل ہیں۔وزیر اعظم شہباز شریف نے لکی مروت میں دہشت گرد حملے کی مذمت کرتے ہوئے شہید پولیس اہل کاروں کو خراج عقیدت پیش کیا، اور کہا کہ دہشت گرد پاکستانی عوام کے کھلے دشمن ہیں، پولیس کی قربانیوں کو سلام پیش کرتا ہوں۔