او آئی سی خواتین کی بااختیاری کے لیے عملی اقدامات پر یقین رکھتی ہے، ڈاکٹر طارق علی

اسلام آباد:اسلامی تعاون تنظیم (او آئی سی )کی خواتین سے متعلق 9ویں وزارتی کانفرنس اختتام پذیر ہو گئی ہے،جس میں رکن ممالک کےخواتین کی ترقی کو پائیدار ترقی اور اُمت کی خوشحالی کے ایک لازمی ستون کے طور پر آگے بڑھانے کے عزم کااعادہ کیا گیا ہے۔اسلامی تعاون تنظیم (او آئی سی) کے اسسٹنٹ سیکرٹری جنرل برائے انسانی، ثقافتی اور سماجی امور ڈاکٹر طارق علی بقیّت نے خواتین سے متعلق 9ویں وزارتی کانفرنس کے اختتام پر اظہار خیال کرتے ہوئے کہا کہ یہ کانفرنس ایک بار پھر اس امر کا واضح ثبوت ہے کہ ہمارے رکن ممالک خواتین کی ترقی کو پائیدار ترقی اور ہماری اُمت کی خوشحالی کے ایک لازمی ستون کے طور پر آگے بڑھانے کے لیے پُرعزم ہیں۔اس کانفرنس کی جامع قرارداد کی منظوری ہمارے مشترکہ سفر میں ایک اہم سنگِ میل ہے۔یہ ہمارے رکن ممالک کے مشترکہ وژن کی عکاسی کرتی ہے اور باہمی تعاون کو مضبوط بنانے، خواتین کو بااختیار بنانے، اور مسلم دنیا میں خواتین کو درپیش بدلتے ہوئے چیلنجز سے نمٹنے کے لیے ایک جامع لائحہ عمل فراہم کرتی ہے۔انہوں نے کہا کہ میں اس قرارداد کی متفقہ منظوری میں اتفاقِ رائے اور تعاون کے جذبے کو سراہتا ہوں۔انہوں نے کہا کہ تاہم، ہماری کامیابی کا اصل پیمانہ صرف آج منظور کی جانے والی قراردادیں نہیں ہوں گی بلکہ یہ ہوگا کہ ہم انہیں عملی اقدامات اور قابلِ پیمائش نتائج میں کس حد تک تبدیل کرتے ہیں۔میں اپنے تمام رکن ممالک، او آئی سی کے اداروں، ذیلی تنظیموں، بین الاقوامی شراکت داروں اور تمام متعلقہ فریقوں سے اپیل کرتا ہوں کہ وہ اس اہم قرارداد اور اس کانفرنس کی منظور شدہ سفارشات پر مؤثر عمل درآمد کو یقینی بنانے کے لیے باہمی تعاون سے کام کریں۔انہوں نے کہا کہ مسلسل تعاون، مربوط اقدامات اور کامیاب تجربات کے تبادلے کے ذریعے ہم اپنے مشترکہ عزم کو رکن ممالک کی خواتین اور بچیوں کی زندگیوں میں حقیقی اور مثبت تبدیلی میں تبدیل کر سکتے ہیں۔انہوں نے کہا کہ پاکستان اس کانفرنس کی صدارت سنبھال رہا ہے۔پاکستان، بطور چیئرمین، خواتین کی مشاورتی کونسل، انسانی ترقی کے ادارے، او آئی سی کے تمام اداروں اور اپنے تمام رکن ممالک کے ساتھ مل کر کام کرے گا تاکہ اس کانفرنس سے پیدا ہونے والی مثبت پیش رفت کو برقرار رکھا جا سکے اور اسے عملی کامیابیوں میں تبدیل کیا جا سکے۔انہوں نےکہا کہ اللہ تعالیٰ ہماری کاوشوں میں برکت عطا فرمائے، ہمارے رکن ممالک کے درمیان یکجہتی اور باہمی تعاون کے رشتوں کو مزید مضبوط کرے، اور ہمیں مسلم دنیا کی خواتین کے وقار، بااختیاری اور فلاح و بہبود کے لیے مل کر کام جاری رکھنے کی توفیق عطا فرمائے۔