قطر کے وزیر اعظم و وزیر خارجہ کا وزیر اعظم شہباز شریف کوٹیلی فون ، پاکستان کی امن کوششوں کی حمایت پر فخر کا اظہار

اسلام آباد(نمائندہ خصوصی):قطر کے وزیرِاعظم و وزیرِ خارجہ شیخ محمد بن عبدالرحمن بن جاسم آل ثانی نے پاکستان کی امن کوششوں کی حمایت پر فخر کا اظہار کرتے ہوئے اس امید کا اظہار کیا ہے کہ ان اقدامات کے نتیجے میں خطے میں پائیدار امن قائم ہوگا۔قطر کے وزیر اعظم و وزیر خارجہ نے وزیر اعظم محمد شہباز شریف کو ہفتہ کو فون کیا۔ وزیر اعظم آفس کے میڈیا ونگ کی طرف سے جاری بیان کے مطابق وزیراعظم نے ریاستِ قطر کے امیر شیخ تمیم بن حمد آل ثانی، اور قطر کے برادر عوامِ کے لیے نیک تمناؤں کا اظہار کیا۔ قطری وزیرِاعظم نے بھی ان جذبات کا بھرپور خیرمقدم کرتے ہوئے جوابی نیک خواہشات کا اظہار کیا۔وزیراعظم نے خلیج کے بحران کے دوران امن کے قیام کے لیے پاکستان کی کوششوں کی بھرپور حمایت پر قطر کا تہہ دل سے شکریہ ادا کیا اور بتایا کہ متعلقہ فریقین کے مابین امن معاہدہ بہت جلد دستخط کے لیے تیار ہوگا۔ پاکستان کی خصوصی سفارتی اور امن کوششوں کو سراہتے ہوئے قطر کے وزیرِاعظم نے وزیراعظم محمد شہباز شریف اور فیلڈ مارشل سید عاصم منیر کو خراجِ تحسین پیش کیا جنہوں نے سفارتی کاوشوں کو مؤثر انداز میں آگے بڑھانے میں کلیدی کردار ادا کیا۔انہوں نے وزیراعظم کو یقین دلایا کہ قطر، پاکستان کی امن کوششوں کی حمایت پر فخر محسوس کرتا ہے اور امید ظاہر کی کہ ان اقدامات کے نتیجے میں خطے میں پائیدار امن قائم ہوگا۔وزیراعظم نے اس موقع پر ریاستِ قطر کے امیر شیخ تمیم بن حمد آل ثانی، کو پاکستان کے سرکاری دورے کی اپنی دعوت کا اعادہ بھی کیا، جس پر دونوں رہنماؤں کے درمیان پہلے ہی اتفاق ہو چکا ہے۔ دونوں رہنماؤں نے قریبی رابطے میں رہنے پر بھی اتفاق کیا۔