اسلام آباد(نمائندہ خصوصی):کل جماعتی حریت کانفرنس آزاد جموں و کشمیر و پاکستان شاخ کے کنوینئر غلام محمد صفی نے اس عزم کا اعادہ کیا ہے کہ کل جماعتی حریت کانفرنس جموں و کشمیر کے عوام کے ناقابلِ تنسیخ حقِ خودارادیت کے حصول کے لیے اقوام متحدہ کی سلامتی کونسل کی متعلقہ قراردادوں اور بین الاقوامی قانونی و اخلاقی اصولوں کی روشنی میں اپنی پرامن، جمہوری اور سیاسی جدوجہد پوری استقامت کے ساتھ جاری رکھے ہوئے ہے۔ جمعرات کو جاری اپنے ایک بیان میں انہوں نے کہا کہ مسئلہ جموں و کشمیر جنوبی ایشیا کا ایک دیرینہ اور بین الاقوامی طور پر تسلیم شدہ تنازعہ ہے جس کے منصفانہ اور پائیدار حل کیلئے اقوام متحدہ نے کشمیری عوام کو آزادانہ، غیر جانبدارانہ اور منصفانہ استصوابِ رائے کے ذریعے اپنے سیاسی مستقبل کا فیصلہ کرنے کا حق دیا ہے۔حریت کانفرنس اسی بنیادی حق کے حصول کو اپنی جدوجہد کا مرکز و محور سمجھتی ہے اور اس مقصد کے حصول تک اپنی سیاسی، سفارتی اور عوامی کوششیں جاری رکھے گی۔ غلام محمد صفی نے واضح کیا کہ حریت کانفرنس آزاد جموں و کشمیر کے 
عوام کو تحریکِ حقِ خودارادیت کا مضبوط دست و بازو تصور کرتی ہے جبکہ مملکتِ خداداد پاکستان کو کشمیری عوام کے حقِ خودارادیت کی حمایت کرنے والا ایک اہم فریق اور دیرینہ پشتیبان سمجھتی ہے۔ انہوں نے کہا کہ ریاست جموں و کشمیر کے عوام، خواہ وہ مقبوضہ جموں و کشمیر میں آباد ہوں، آزاد جموں و کشمیر یا پاکستان اور دنیا کے مختلف ممالک میں مقیم کشمیری تارکینِ وطن ہوں، سب اس مشترکہ قومی مقصد کے امین ہیں اور ان کی وحدت ہی تحریک کی اصل قوت ہے۔کنوینئر حریت کانفرنس نے ریاستی عوام کے مختلف طبقات، خصوصاً مہاجرینِ جموں و کشمیر اور انصار کے درمیان اختلافات پیدا کرنے اور انہیں ایک دوسرے کے مقابل لا کھڑا کرنے کی کوششوں پر گہری تشویش کا اظہار کرتے ہوئے کہا کہ ایسی تمام کوششیں دراصل کشمیری عوام کی اجتماعی جدوجہد کو کمزور کرنے اور دشمن کے عزائم کو تقویت پہنچانے کے مترادف ہیں۔ انہوں نے کہا کہ موجودہ حالات میں قومی اتحاد، سیاسی بصیرت اور مشترکہ مقصد کے گرد اجتماع وقت کی اہم ترین ضرورت ہے۔ انہوں نے مقبوضہ جموں و کشمیر، آزاد جموں و کشمیر،پاکستان اور دنیا بھر میں آباد کشمیری عوام سے اپیل کی کہ وہ حقِ خودارادیت اور استصوابِ رائے کے بنیادی نکتے پر مکمل یکجہتی کا مظاہرہ کریں، اپنے قومی مفادات کو ہر قسم کے گروہی، علاقائی اور وقتی اختلافات پر ترجیح دیں اور دوست و دشمن کے درمیان فرق کو ہمیشہ واضح رکھیں۔انہوں نے کہا کہ کشمیری عوام کی کامیابی کا راز ان کے اتحاد، قربانیوں اور اپنے قومی نصب العین سے غیر متزلزل وابستگی میں مضمر ہے۔ غلام محمد صفی نے کہا کہ حریت کانفرنس ریاستی عوام کو ایسے تمام معاملات میں تقسیم کرنے کے بجائے جو وقتی یا انتظامی نوعیت کے ہوں، انہیں حقِ خودارادیت کے مشترکہ قومی ایجنڈے پر متحد کرنے کو اپنی بنیادی ذمہ داری سمجھتی ہے۔ انہوں نے زور دیا کہ اسمبلی کی نشستوں یا دیگر داخلی امور سے متعلق اختلافات کو قومی اتحاد پر حاوی نہیں ہونا چاہیے، کیونکہ کشمیری عوام کی اصل منزل اور اولین ترجیح اقوام متحدہ کی قراردادوں کے مطابق اپنے مستقبل کے تعین کا حق حاصل کرنا ہے۔انہوں نے اس عزم کا اعادہ کیا کہ کل جماعتی حریت کانفرنس اپنی تمام تر توانائیاں ریاست جموں و کشمیر کے عوام کے بنیادی، جمہوری اور سیاسی حقوق کے حصول، مسئلہ کشمیر کے منصفانہ حل اور کشمیری عوام کی اجتماعی امنگوں کی تکمیل کے لیے وقف رکھے گی اور اس مقصد کے لیے قومی اتحاد، سیاسی ہم آہنگی اور مشترکہ جدوجہد کے فروغ کو ہر سطح پر ترجیح دیتی رہے گی۔
