وزارت اطلاعات و نشریات نے کنڑ حملوں سے متعلق افغان میڈیا اور افغان طالبان حکام کا بے بنیاد پروپیگنڈا مسترد کر دیا

اسلام آباد۔( نمائندہ خصوصی):وزارت اطلاعات و نشریات نے کنڑ حملوں سے متعلق افغان میڈیا اور افغان طالبان حکام کا بے بنیاد پروپیگنڈا مسترد کر دیا۔ فیکٹ چیک وزارت اطلاعات و نشریات کی سماجی رابطہ کے پلیٹ فارم ”ایکس“ پر کی گئی پوسٹ میں کہا گیا ہے کہ افغان صوبے کنڑ میں فرضی حملوں کے حوالے سے افغان میڈیا اور افغان حکام کی جانب سے مسلسل پروپیگنڈا مہم جسے بھارتی پروپیگنڈا عناصر کی پشت پناہی حاصل ہے، اس بات کی نشاندہی کرتی ہے کہ افغان طالبان رجیم جس کے پاس اپنے شہریوں کو خدمات، فلاح و بہبود اور حکمرانی کے حوالے سے دینے کے لئے کچھ نہیں، صرف غلط معلومات اور نفرت پر انحصار کر رہی ہے۔انہوں نے اپنے بھارتی پروپیگنڈا ماسٹرز سے صرف جھوٹ اور فالس فلیگ آپریشنز ہی سیکھے ہیں۔ ایسے قابل رحم ہتھکنڈے اور گھناؤنے الزامات مضحکہ خیز ہیں۔ تاہم یہ واضح ہونا چاہئے کہ آپریشن غضب للحق کے تحت جب بھی اور جہاں بھی پاکستان افغان سرزمین پر موجود دہشت گرد ڈھانچے کو نشانہ بنائے گا تو یہ سابقہ کارروائیوں کی طرح مکمل طور پر اعلان شدہ اور دہشت گردی کی معاونت کرنے والے ڈھانچے کو نشانہ بنانے کے واضح اور ٹھوس شواہد کی بنیاد پر ہوگا۔