ماہرینِ صحت نے ایچ آئی وی کے پھیلاؤ کی روک تھام کے لیے ٹیسٹنگ میں توسیع اور آگاہی مہمات ناگزیر قراردے دیا

اسلام آباد۔( نمائندہ خصوصی):ماہرینِ صحت نے ایچ آئی وی کے پھیلائو کوموثر طور پر روکنے کے لیے ٹیسٹنگ کے دائرہ کار کو وسیع کرنے، خون اور طبی طریقہ کار کی سخت اسکریننگ اور عوامی آگاہی مہمات کو مزید مضبوط بنانے کی ضرورت پر زور دیا۔ اتوار کے روز ڈاکٹر قائد سعید اور ڈاکٹر رانا جواد اصغر سمیت دیگر ماہرین نے نجی میڈیا چینلز کو خصوصی پیغامات میں ایچ آئی وی کے پھیلائو کو روکنے کے لیے وسیع پیمانے پر ٹیسٹنگ، ہدفی آگاہی، اور رویہ جاتی اقدامات کی اہمیت کو اجاگر کیا۔ماہرین نے کہا کہ ایچ آئی وی اب کسی ایک مخصوص طبقے تک محدود نہیں رہا بلکہ معاشرے کے مختلف حصوں میں اس کے کیسز رپورٹ ہو رہے ہیں۔ انہوں نے خبردار کیا کہ پھیلائو کے انداز سے ظاہر ہوتا ہے کہ یہ انفیکشن پہلے کے مقابلے میں زیادہ وسیع ہو رہا ہے۔انہوں نے احتیاطی تدابیر اختیار کرنے کا مشورہ دیا جن میں محفوظ اور اسکرین شدہ خون کی منتقلی، جراثیم سے پاک اور ایک بار استعمال ہونے والی سرنجوں کا استعمال اور منتقلی کے خطرات کے بارے میں عوامی آگاہی میں اضافہ شامل ہیں۔علامات کے حوالے سے ماہرین نے بتایا کہ ایچ آئی وی ابتدا میں فلو جیسی کیفیت، مسلسل بخار، تھکن، وزن میں کمی اور بار بار انفیکشن کی صورت میں ظاہر ہو سکتا ہے۔ انہوں نے اس بات پر زور دیا کہ کئی کیسز میں یہ بیماری طویل عرصے تک تشخیص کے بغیر رہتی ہے اس لیے بروقت ٹیسٹنگ نہایت ضروری ہے تاکہ بروقت تشخیص اور علاج ممکن ہو سکے۔انہوں نے اس بات پر بھی زور دیا کہ میڈیا کو اس بیماری کے پھیلائو کو روکنے کے لیے آگاہی مہمات میں اہم کردار ادا کرنا چاہیے۔