راولپنڈی۔( نمائندہ خصوصی):پاکستان ملٹری اکیڈمی (پی ایم اے) کاکول میں 153ویں پی ایم اے لانگ کورس، 38ویں ٹیکنیکل گریجویٹ کورس، 72ویں انٹیگریٹڈ کورس، 15ویں مجاہد کورس اور 27ویں لیڈی کیڈٹ کورس کے کیڈٹس کی 
پاسنگ آؤٹ پریڈ کا انعقاد کیا گیا۔ ہفتہ کو پاک فوج کے شعبہ تعلقات عامہ (آئی ایس پی آر) کی جانب سے جاری پریس ریلیز کے مطابق پاکستان ملٹری اکیڈمی سے عراق، مالدیپ، مالی، نیپال، فلسطین، قطر اور سری لنکا سمیت متعدد دوست ممالک کے کیڈٹس نے بھی گریجویشن کی ہے۔پاک فضائیہ کے سربراہ ایئر چیف مارشل ظہیر احمد بابر سدھو 
نشان امتیاز (ملٹری) ہلال جرات نے بطور مہمان خصوصی تقریب میں شرکت کی ۔پاکستان ملٹری اکیڈمی کاکول میں پاسنگ آؤٹ تقریب سے خطاب کرتے ہوئے ایئر چیف مارشل ظہیر احمد بابر سدھو کا کہنا ہے کہ معرکہ حق اور آپریشن بنیان مرصوص میں پاکستان آرمی کی حکمت عملی پوری دنیا نے دیکھی۔انہوں نے کہا کہ پاکستان ایئر فورس نے ناصرف 
دشمن کے جہاز گرائے بلکہ تاریخ رقم کی۔ مئی میں دشمن پاکستان کی طاقت اور ہنر مندی دیکھ کر دنگ رہ گیا۔ایئر چیف مارشل ظہیر احمد بابر سدھو کا کہنا ہے کہ پاکستان کی دھرتی پر کسی قسم کی جارحیت کا منہ توڑ جواب دیا جائے گا، عالمی سطح پر امن کے لیے سیاسی و عسکری قیادت کی کاوشیں قابل ستائش ہیں۔انہوں نے کہا کہ عالمی امن کے لیے فیلڈ مارشل سید عاصم منیر کی کوششوں کو خصوصی طور پر سراہتا ہوں، پاکستان پُرامن ملک ہے، تنازعات کا حل مذاکرات سے کرنے پر یقین رکھتا ہے۔
