اسلام آباد۔( نمائندہ خصوصی):وزیرِ دفاع خواجہ محمد آصف نے ترکیہ کے ساتھ دیرینہ برادرانہ تعلقات کو مزید مستحکم بنانے کے پاکستان کے عزم کا اعادہ کیاہے اور دونوں ممالک کے درمیان دفاع، تربیت اور دفاعی صنعت کے شعبوں میں بڑھتے ہوئے تعاون کو سراہاہے۔منگل کو وزارت دفاع سے جاری بیان کے مطابق ترک جنرل سٹاف کے نائب سربراہ جنرل لیونت ارگُن نے وفاقی وزیرِ دفاع خواجہ محمد آصف سے یہاں ملاقات کی۔ملاقات کے دوران باہمی دلچسپی کے امور پر تبادلہ خیال کیا گیا جس میں پاکستان اور 
ترکیہ کے درمیان دفاعی اور عسکری تعاون کو مزید مضبوط بنانے پر خصوصی توجہ دی گئی۔وزیرِ دفاع نے معزز مہمان کا خیرمقدم کرتے ہوئے ترکیہ کے ساتھ دیرینہ برادرانہ تعلقات کو مزید مستحکم بنانے کے پاکستان کے عزم کا اعادہ کیا۔ انہوں نے پاکستان کی جانب سے ترکیہ کے ساتھ سٹریٹجک شراکت داری کی اہمیت کو اجاگر کیا اور دفاع، تربیت اور دفاعی صنعت کے شعبوں میں بڑھتے ہوئے تعاون کو سراہا۔ دونوں معزز شخصیات نے اس بات کی توثیق کی کہ پاکستان اور ترکیہ علاقائی و عالمی امور پر یکساں نقطۂ نظر رکھتے ہیں اور سفارتی معاملات میں قریبی ہم آہنگی برقرار رکھے ہوئے ہیں۔جنرل لیونت ارگُن نے ترک وفد کے لئے پرتپاک مہمان نوازی پر شکریہ ادا کیا اور باہمی دلچسپی کے شعبوں میں دفاعی تعاون کو مزید وسعت دینے کے ترکی کے عزم کا اظہار کیا۔دونوں جانب نے پاک ترکیہ تعلقات کی مثبت پیشرفت پر اطمینان کا اظہار کیا اور مستقبل میں قریبی رابطوں اور اعلیٰ سطحی تبادلوں کو جاری رکھنے کے عزم کا اعادہ کیا۔
