کراچی:کشمیری حریت رہنماؤں آسیہ اندرابی، فہمیدہ صوفی اور ناہیدہ نسرین کے حق میں ایک بھرپور اور پرامن احتجاجی مظاہرہ

کراچی ( اسٹاف رپورٹر )ہیومن رائٹس کونسل آف پاکستان کے زیر اہتمام اتوار کو کراچی پریس کلب کے باہر کشمیری حریت رہنماؤں آسیہ اندرابی، فہمیدہ صوفی اور ناہیدہ نسرین کے حق میں ایک بھرپور اور پرامن احتجاجی مظاہرہ منعقد کیا گیا۔احتجاج میں شہریوں، انسانی حقوق کے کارکنان، وکلا، صحافیوں اور سول سوسائٹی کے نمائندگان کی بڑی تعداد نے شرکت کی۔ شرکاء نے بینرز اور پلے کارڈز اٹھا رکھے تھے ۔جن پر کشمیری رہنماؤں کی رہائی اور انصاف کی فراہمی کے مطالبات درج تھے۔ مظاہرے سے جماعت اسلامی کے ڈاکٹر معراج الہدی صدیقی۔فلسطین فانڈویشن کے ڈاکٹر صابر ابومریم.کشمیری رہنماء بشیر سدوزئی۔بشیر درس ۔عاصمہ ساجد اور دیگرخطاب کیا۔مقررین نے اپنے خطاب میں کہا کہ کشمیری حریت رہنماؤں کو سنائی گئی سزائیں بنیادی انسانی حقوق، آزادی اظہار اور سیاسی آزادیوں کی کھلی خلاف ورزی ہیں۔ انہوں نے عالمی برادری، بالخصوص اقوام متحدہ اور دیگر انسانی حقوق کے اداروں سے مطالبہ کیا کہ وہ اس معاملے کا فوری نوٹس لیں اور متاثرہ رہنماؤں کی رہائی کے لیے کردار ادا کریں۔احتجاج کے دوران شرکاء نے پرامن طریقے سے اپنے مطالبات پیش کیے اور اس عزم کا اظہار کیا کہ وہ کشمیری عوام کے حقوق کے لیے اپنی آواز بلند کرتے رہیں گے۔ہیومن رائٹس کونسل آف پاکستان نے اس بات پر زور دیا کہ عالمی سطح پر انصاف اور انسانی حقوق کے تحفظ کے لیے سنجیدہ اقدامات ناگزیر ہیں۔