اسلام آباد( نمائندہ خصوصی):پاکستان نے چین۔ پاکستان انفارمیشن کوریڈور کو ادارہ جاتی شکل دینے کے منصوبے کوآگے بڑھاتے ہوئے دوطرفہ معلوماتی تعاون کے پہلو کو ازسرِنو متعین کرنے کے لیے اہم اقدامات کیے ہیں جو مشترکہ اقدامات کے بارے میں زیادہ مربوط اور اسٹریٹجک ابلاغ کی عکاسی کرتے ہیں۔ اس سلسلے میں منعقدہ اعلیٰ سطحی اجلاس کی صدارت وزیر مملکت برائے موسمیاتی تبدیلی و ماحولیاتی ہم آہنگی ڈاکٹر شذرہ منصب نے کی جس میں حکومت، میڈیا اور اسٹریٹجک اداروں کے سینئر نمائندگان نے شرکت کی تاکہ اس اقدام کو عملی شکل دینے کے عمل کو تیز کیا جا سکے۔
ڈاکٹر شذرہ منصب نے کہا کہ آج کی دنیا میں شراکت داریاں صرف انفراسٹرکچر اور سرمایہ کاری پر نہیں بلکہ بیانیے، تاثر اور اعتماد پر بھی قائم ہوتی ہیں۔ انہوں نے کہا کہ چین۔ پاکستان انفارمیشن کوریڈور ایک منظم پلیٹ فارم کے طور پر کام کرے گا تاکہ دونوں ممالک کے تعاون کو وضاحت، ہم آہنگی اور مؤثر انداز میں پیش کیا جا سکے۔اجلاس میں وزارتِ اطلاعات و نشریات، وزارتِ خارجہ، پاکستان ٹیلی وژن، پریس انفارمیشن ڈیپارٹمنٹ، آئی ایس پی آر، سی پی اتھارٹی، پاکستان چین انسٹیٹیوٹ اور عوامی جمہوریہ چین کے سفارت خانے کے حکام نے شرکت کی۔ اعلان کیے گئے اقدامات میں وزارتِ اطلاعات و نشریات کے ایکسٹرنل پبلسٹی ونگ میں چین۔ پاکستان انفارمیشن کوریڈور سیکریٹریٹ کے قیام کا فیصلہ شامل ہے جو پاکستان کے اسٹریٹجک ابلاغی ڈھانچے کو مضبوط بنانے کی جانب ایک اہم قدم ہے۔
اجلاس میں میڈیا، تھنک ٹینکس، کاروباری روابط اور نوجوانوں کے تعاون کے لیے ذیلی کمیٹیوں کے قیام کی بھی منظوری دی گئی تاکہ مختلف شعبوں میں اس اقدام پر مؤثر عملدرآمد یقینی بنایا جا سکے۔ آئندہ اقدامات میں پاکستان چین میڈیا فورم، انفلوئنسرز کے تبادلہ پروگرام، مشترکہ دستاویزی فلموں کی تیاری اور ڈیجیٹل پلیٹ فارمز کے ذریعے باخبر عوامی مکالمے کے فروغ جیسے اقدامات شامل ہیں۔ چین۔ پاکستان انفارمیشن کوریڈور عالمی بیانیے پر تیزی سے اثر انداز ہونے والے جغرافیائی سیاسی نتائج کے دوران ایک دوراندیش حکمت عملی ہے، جس کا مقصد پاکستان اور چین کے تعاون کو مؤثر طریقے سے نافذ، پیش اور برقرار رکھنا ہے۔
