ڈائریکٹر آف نیشنل انٹیلیجنس کی جانب سے پاکستان کے میزائل پروگرام کو ممکنہ خطرہ قرار دینا بے بنیاد اور غلط ہے۔ترجمان دفتر خارجہ

اسلام آباد( نمائندہ خصوصی)ترجمان دفتر خارجہ نے امریکہ کی جانب سے پاکستان کے میزائل پروگرام سے متعلق دیے گئے بیان کو مسترد کر دیا ہے۔دفتر خارجہ کے ترجمان طاہر اندرابی نے کہا ہے کہ امریکہ کے ڈائریکٹر آف نیشنل انٹیلیجنس کی جانب سے پاکستان کے میزائل پروگرام کو ممکنہ خطرہ قرار دینا بے بنیاد اور غلط ہے۔ انہوں نے واضح کیا کہ پاکستان کی اسٹریٹجک صلاحیتیں مکمل طور پر دفاعی نوعیت کی ہیں، جن کا مقصد قومی خودمختاری کا تحفظ اور جنوبی ایشیا میں امن و استحکام کو برقرار رکھنا ہے۔ترجمان کے مطابق پاکستان کا میزائل پروگرام بین البراعظمی حد سے کم ہے اور یہ بھارت کے مقابلے میں “کم از کم قابل اعتماد دفاعی حکمت عملی” (Credible Minimum Deterrence) کے اصول پر مبنی ہے۔ اس کے برعکس بھارت کے میزائل پروگرام کی رینج 12 ہزار کلومیٹر سے تجاوز کر چکی ہے، جو خطے اور اس سے باہر کے ممالک کے لیے تشویش کا باعث ہے۔طاہر اندرابی نے کہا کہ پاکستان امریکہ کے ساتھ باہمی احترام، عدم امتیاز اور حقائق پر مبنی تعلقات کے فروغ کے لیے پرعزم ہے۔ انہوں نے زور دیا کہ جنوبی ایشیا کے حساس اسٹریٹجک ماحول کو مدنظر رکھتے ہوئے محتاط اور متوازن رویہ اختیار کیا جانا چاہیے تاکہ خطے میں امن، سلامتی اور استحکام کو فروغ دیا جا سکے۔