افغانوں کی مہمان نوازی سب سے بڑی غلطی تھی،یہ مسجدوں پہ حملے کرواتے ہیں، خواجہ محمد آصف

اسلام آباد۔( نمائندہ خصوصی):وزیر دفاع خواجہ محمد آصف نے کہا ہے کہ اپنی 78 سالہ تاریخ میں افغانوں کی مہمان نوازی سب سے بڑی غلطی تھی،یہ مسجدوں پہ حملے کرواتے ہیں، سر بسجود نمازیوں کو شہید کرتے ہیں ،نہتے شہریوں، بازاروں اور سکولوں کو نشانہ بناتے ہیں، معصوم بچوں کو خون میں نہلاتے ہیں۔ منگل کوسماجی رابطے کی ویب سائٹ ایکس (ٹویٹر) پر پوسٹ میں انہوں نے لکھا کہ ‏پاکستان کی طرف سے افغانستان کے ہسپتال پر حملے کا دعویٰ ان کی طرف سے آرہا ہے جو مسجدوں پہ حملے کرواتے ہیں، سر بسجود نمازیوں کو شہید کرتے ہیں نہتے شہریوں، بازاروں اور سکولوں کو نشانہ بناتے ہیں، معصوم بچوں کو خون میں نہلاتے ہیں۔وزیر دفاع نے کہا کہ منشیات کی سمگلنگ جن کا ذریعہ آمدنی ہو، محسن کش لوگ اس ریاست پر حملہ آور ہیں جس نے50 سال سے انہیں پناہ دی، جو وعدہ کرتے ہیں اس کااحترام نہیں کرتے، اربوں روپے وعدہ پورا کرنے کے لیے تاوان مانگتے ہیں۔ خواجہ آصف نے کہا کہ پاکستان کی مٹی نے نہ صرف ان کو پناہ دی ان کے لیے ایک سپر پاور سے ٹکرا گئے، تین نسلوں کی مہمان نوازی کی، ہم نے اپنی 78 سالہ تاریخ میں بہت غلطیاں کیں لیکن ان کی مہمان نوازی سب سے بڑی غلطی ہے، اللہ ہمیں معاف کرے۔