لاہور۔(اسپورٹس ڈیسک):انٹرنیشنل کرکٹ کونسل (آئی سی سی) نے فروری کے پلیئر آف دی منتھ ایوارڈ کے لیے نامزد کھلاڑیوں کا اعلان کر دیا ہے۔ مردوں کے ایوارڈ کے لیے پاکستان کے اوپنر صاحبزادہ فرحان، انگلینڈ کے آل رانڈر ول جیکس اور امریکا کے فاسٹ بولر شیڈلی وین شالکویک کو شارٹ لسٹ کیا گیا ہے جبکہ خواتین کے ایوارڈ کے لیے سری لنکا کی بیٹر ہرشیتھا سماراوکرما، پاکستان کی کپتان فاطمہ ثنا اور بھارت کی فاسٹ بولر اروندھتی ریڈی کو نامزد کیا گیا ہے۔پاکستان کے اوپنر صاحبزادہ فرحان نے ٹی ٹوئنٹی ورلڈ کپ میں شاندار بیٹنگ کا مظاہرہ کرتے ہوئے سات میچوں میں 383 رنز بنائے۔ ان کی اوسط 76.60 اور اسٹرائیک ریٹ 160.25 رہا۔ انہوں نے ایک ایڈیشن میں سب سے زیادہ رنز بنانے کا ریکارڈ قائم کیا اور دو سنچریاں نمیبیا اور سری لنکا کے خلاف بنائیں۔انگلینڈ کے ول جیکس نے بیٹنگ اور بولنگ دونوں شعبوں میں نمایاں کارکردگی دکھائی۔انہوں نے ٹی ٹوئنٹی میچوں 
میں 192 رنز 173.21 کے اسٹرائیک ریٹ سے بنائے اور ساتھ ہی 11 وکٹیں بھی حاصل کیں۔ انہیں چار مرتبہ پلیئر آف دی میچ کا ایوارڈ بھی ملا جبکہ ان کی ٹیم سیمی فائنل تک پہنچی۔امریکا کے فاسٹ بولر شیڈلی وین شالکویک نے ٹی ٹوئنٹی ورلڈ کپ میں صرف چار میچوں میں 13 وکٹیں حاصل کیں اور ابتدائی گروپ مرحلے میں سب سے زیادہ وکٹیں لینے والے بولر رہے۔ انہوں نے بھارت اور پاکستان دونوں کے خلاف چار، چار وکٹیں حاصل کیں جبکہ نیدرلینڈز کے خلاف تین وکٹیں لیں۔خواتین کی کیٹیگری میں سری لنکا کی ہرشیتھا سماراوکرما نے ویسٹ انڈیز کے خلاف ون ڈے سیریز میں تین میچوں میں 171 رنز بنا کر اپنی ٹیم کو 2-1 سے فتح دلانے میں اہم کردار ادا کیا۔ انہوں نے اس سیریز میں 66، 35 اور 70 رنز کی اننگز کھیلیں۔پاکستان کی کپتان فاطمہ ثنا نے 
جنوبی افریقہ کے خلاف ون ڈے اور ٹی ٹوئنٹی سیریز میں عمدہ آل راونڈ کارکردگی دکھائی۔ انہوں نے ون ڈے میں 57 رنز بنائے اور دو وکٹیں حاصل کیں جبکہ ٹی ٹوئنٹی سیریز میں 90 اور ناقابل شکست 47 رنز کی اننگز کھیلنے کے ساتھ دو وکٹیں بھی لیں۔ایوارڈ کے فاتح کا فیصلہ آئی سی سی ووٹنگ اکیڈمی اور دنیا بھر کے شائقین کی ووٹنگ سے کیا جائے گا۔ ووٹنگ میں آئی سی سی ووٹنگ اکیڈمی کا حصہ 90 فیصد جبکہ مداحوں کے ووٹ کا حصہ 10 فیصد ہوگا اور ہر ماہ کے دوسرے ہفتے میں فاتح کا اعلان کیا جاتا ہے۔
