اسلام آباد۔( نمائندہ خصوصی):نائب وزیراعظم و وزیر خارجہ سینیٹر محمد اسحاق ڈار نے 2026 میں پاکستان کی میزبانی میں منعقد ہونے والی اسلامی تعاون تنظیم (او آئی سی) کی خواتین سے متعلق 9 ویں وزارتی کانفرنس کی تیاریوں کے جائزہ اجلاس کی صدارت کی۔
جمعرات کو وزارت خارجہ سے جاری بیان کے مطابق اجلاس میں پیش رفت کا تفصیلی جائزہ لیا گیا اور اس بات پر زور دیا گیا کہ کانفرنس کے کامیاب انعقاد کو یقینی بنانے کے لیے بروقت رابطہ کاری کو یقینی بنایا جائے۔نائب وزیراعظم و وزیر خارجہ سینیٹر محمد اسحاق ڈار نے متعلقہ وزارتوں اور تمام شراکت داروں کو ہدایت کی کہ وہ او آئی سی سیکریٹریٹ کے ساتھ قریبی تعاون سے انتظامی و لاجسٹک انتظامات اور موضوعاتی ترجیحات کو حتمی شکل دیں۔اجلاس میں وفاقی وزیر قانون و انصاف سینیٹر اعظم نذیر تارڑ، وزیراعظم کےمعاون خصوصی طارق باجوہ، سیکرٹری خارجہ سفیر آمنہ بلوچ، سیکرٹری کابینہ ڈویژن اور سیکرٹری انسانی حقوق ڈویژن سمیت وزارت خزانہ، داخلہ اور دیگر متعلقہ وزارتوں کے سینئر حکام نے شرکت کی۔
