اسپیکر قومی اسمبلی سردار ایاز صادق سے صوبائی محتسب خیبر پختونخوا محترمہ رباب مہدی کی ملاقات

اسلام آباد(نمائندہ خصوصی)اسپیکر قومی اسمبلی سردار ایاز صادق سے صوبائی محتسب خیبر پختونخوا محترمہ رباب مہدی نے منگل کے روز پارلیمنٹ ہاؤس اسلام آباد میں ملاقات کی۔محتسب خیبر پختونخوا محترمہ ارباب مہدی نے اسپیکر قومی اسمبلی کو محتسب خیبر پختونخواہ کی کارکردگی اور بلخصوص خواتین کے وراثتی حقوق کے تحفظ کے لیے اور ضم شدہ اضلاع میں خواتین کو درپیش مسائل کے حل کیلئے اٹھائے گئے اقدامات سے متعلق تفصیلی بریفننگ دی۔ انہوں نے شکایات کے ازالے کے نظام اور وراثت سے متعلق تنازعات کے بروقت حل کے ذریعے خواتین کو فراہم کی جانے والی سہولیات سے آگاہ کیا۔اسپیکر قومی اسمبلی سردار ایاز صادق نے خواتین کے حقوق کے تحفظ اور انکو بروقت انصاف کی فراہمی میں محتسب خیبر پختونخوا کی کارکردگی کو سراہا۔ انہوں نے خواتین کا وراثت میں حق کے تحفظ اور ادارہ جاتی معاونت کے فروغ میں محتسب خیبر پختونخواہ کے کردار کو نہایت اہم قرار دیا۔محترمہ رباب مہدی نے خواتین کے بااختیار بنانے اور پارلیمانی اصلاحات کے لیے اسپیکر قومی اسمبلی سردار ایاز صادق کے اقدامات کو قابلِ تحسیں قرار دیا۔ انہوں نے خیبر پختونخوا محتسب کے دفتر اور ویمن پارلیمانی کاکس کے درمیان قریبی روابط کو خواتین سے متعلق قانون سازی، پالیسی نگرانی اور مؤثر عملدرآمد کے لیے ناگزیر قرار دیا۔اسپیکر قومی اسمبلی نے وزیر اعلیٰ پنجاب محترمہ مریم نواز شریف کی جانب سے جائیداد اور وراثتی حقوق کے مؤثر نفاذ کے لیے اٹھائے گئے اقدامات کو بھی سراہا۔ انہوں نے پنجاب حکومت کی جانب سے قانونی اصلاحات، لینڈ ریکارڈ کے نظام میں بہتری اور جائیداد سے متعلق تنازعات کے بروقت حل کے اقدامات کو خواتین کے جائز وراثتی حقوق کے تحفظ، شفافیت، انصاف اور قانون کی بالادستی کے فروغ کی جانب اہم پیش رفت قرار دیا۔