راولپنڈی( نمائندہ خصوصی):برف باری سے متاثربرزل پاس پر رات بھر سے جاری برف ہٹانے کی کوششوں کے دوران برفانی تودے کے گرنے سے پاک فوج کے کیپٹن اصمد، سپاہی رضوان اور ایک سویلین مشین آپریٹرعیسیٰ شہید ہو گئے۔پاک فوج کے شعبہ تعلقات 
عامہ (آئی ایس پی آر )کی جانب سے جاری کردہ اعلامیے کے مطابق خطے میں فوجی دستوں کی آپریشنل نقل و حرکت کو آسان بنانے کے لیےمشینری کے ذریعے برف ہٹانے کا یہ آپریشن ہفتے کی صبح سے جاری تھا۔اعلامیے میں مزید کہا گیا کہ برفباری سے متاثر برزل پاس میں کلیئرنس آپریشن کی قیادت کیپٹن اصمد (عمر 28 سال، سکنہ لاہور) کر رہے تھے۔2 اور 3 جنوری کی درمیانی 
شب تقریباً 2 بجے جب مذکورہ آپریشن جاری تھاکہ برفانی تودہ گرنے کے نتیجے میں کیپٹن اصمد، دو سپاہی اور مشین آپریٹر (پی ڈبلیو ڈی)تودے کے نیچے دب گئے۔ انتہائی کوششوں کے بعد چاروں افراد کو برف سے نکال لیا گیا تاہم کیپٹن اصمد، سپاہی رضوان (عمر 32 سال، سکنہ اٹک) اور مشین آپریٹر عیسیٰ (سکنہ استور) جام شہادت نوش کر گئے۔اعلامیے میں کہا گیا کہ شہدا 
نے انتہائی سخت موسمی حالات میں ایک مشکل آپریشن کی قیادت کرتے ہوئے عظیم قربانی دی۔ ان کی قربانی اور فرض سے وابستگی اس بات کی غماز ہے کہ مسلح افواج پاکستان کے تمام رینک کے افسران اور جوان وطنِ عزیز کے دفاع کے لیے پرعزم ہیں اور وہ فرض اور مقصد کے راستے میں اپنی جان قربان کرنے سے بھی گریز نہیں کریں گے۔
