پاکستان اور بھارت کا جوہری تنصیبات اور سہولیات کی فہرستوں کا سالانہ بنیادوں پر تبادلہ

اسلام آباد( نمائندہ خصوصی)پاکستان اور بھارت نے جوہری تنصیبات اور سہولیات کی فہرستوں کا سالانہ بنیادوں پر تبادلہ کر لیا ہے ،یہ تبادلہ پاکستان اور بھارت کے درمیان جوہری تنصیبات اور سہولیات پر حملوں کی ممانعت سے متعلق معاہدے کے تحت عمل میں آیا ۔جمعرات کو وزارتِ خارجہ سے جاری بیان کے مطابق دونوں ممالک نے ایک دوسرے کی جوہری تنصیبات اور سہولیات کی تفصیلات کا تبادلہ کیا۔پاکستان میں موجود جوہری تنصیبات اور سہولیات کی فہرست اسلام آباد میں قائم بھارتی ہائی کمیشن کے ایک نمائندے کے حوالے کی گئی جبکہ اسی وقت بھارتی وزارتِ خارجہ نے بھارت کی جوہری تنصیبات اور سہولیات کی فہرست نئی دہلی میں قائم پاکستان ہائی کمیشن کے نمائندے کو فراہم کی۔بیان کے مطابق یہ تبادلہ پاکستان اور بھارت کے درمیان جوہری تنصیبات اور سہولیات پر حملوں کی ممانعت سے متعلق معاہدے کے تحت عمل میں آیا جس کے مطابق دونوں ممالک ہر سال یکم جنوری کو معاہدے کے دائرہ کار میں آنے والی اپنی جوہری تنصیبات اور سہولیات سے ایک دوسرے کو آگاہ کرنے کے پابند ہیں ،یہ معاہدہ 31 دسمبر 1988 کو طے پایا تھا اور 27 جنوری 1991 کو نافذ العمل ہوا جبکہ دونوں ممالک یکم جنوری 1992 سے باقاعدگی سے ان فہرستوں کا تبادلہ کر رہے ہیں ۔