پیپلز پارٹی نے 1973ء کے آئین کی قیمت ادا کی ، آئین کے تحفظ اور استحکام کے لیے ہمیشہ جدوجہد کی ہے،سینیٹر شیری رحمان

اسلام آباد۔,( نمائندہ خصوصی)پیپلز پارٹی کی رہنما سینیٹر شیری رحمان نے کہا ہے کہ ان کی جماعت نے 1973ء کے آئین کی قیمت ادا کی اور اس آئین کے تحفظ و استحکام کے لیے ہمیشہ جدوجہد کی ہے۔ہفتے کو ایوان بالا کے اجلاس میں انہوں نے کہا کہ آئینی ترامیم ان ایوانوں کا جمہوری حق ہیں جن کے ذریعے وفاقی اکائیوں اور عوام کے حقوق کا تحفظ ممکن ہوتا ہے۔شیری رحمان نے واضح کیا کہ اٹھارویں آئینی ترمیم کو ریورس نہیں کیا جارہا بلکہ اس کا تحفظ کیا جارہا ہے تاکہ صوبائی خودمختاری کو برقرار رکھا جاسکے۔انہوں نے کہا کہ پاکستان کے اصل مسائل وسائل کی منصفانہ تقسیم سے جڑے ہوئے ہیں اور اس حوالے سے تمام سیاسی قوتوں کو مل بیٹھ کر قومی مفاد میں فیصلے کرنے چاہئیں۔سینیٹر شیری رحمان نے محترمہ بینظیر بھٹو شہید کا حوالہ دیتے ہوئے کہا کہ بینظیر بھٹو ہمیشہ کہتی تھیں کہ ایوان کا بائیکاٹ نہ کریں بلکہ پارلیمان کے اندر رہ کر جمہوری جدوجہد کریں۔انہوں نے اس عزم کا اظہار کیا کہ پیپلز پارٹی آئین، جمہوریت اور وفاق کے استحکام کے لیے اپنی روایت برقرار رکھے گی۔