اسلام آباد(نمائندہ خصوصی )وزیراعظم یوتھ پروگرام کے چیئرمین رانا مشہود احمد خاں نے جمعرات کو نیشنل پریس کلب اسلام آباد کا دورہ کیا ۔ اس موقع پر انہوں نے نئے تزئین شدہ این پی سی سپورٹس روم کا افتتاح کیا اور میٹ دی پریس پروگرام میں شرکت کی۔قبل ازیں پریس کلب پہنچنے پر سیکرٹری این پی سی نیئر علی ، نائب صدر سید ظفر ہاشمی ، سینئر جوائنٹ سیکرٹری شیراز گردیزی، ممبر گورننگ باڈی عامر رفیق بٹ، نوید احمد شیخ اور جعفر علی بلتی سمیت دیگر نےاستقبال کیا۔ سیکرٹری این پی سی نیئر علی اور نائب صدر سید ظفر ہاشمی نے این پی سی آمد اور این پی سی سپورٹس روم کی تزئین و آرائش کرانے پر بھی رانا مشہود احمد خاں کا شکریہ ادا کیا اور کہا کہ وہ صحافیوں اور میڈیا کے دوست ہیں جو اپنے فرائض کو 
بڑی جانفشانی کے ساتھ سرانجام دے رہے ہیں۔اس موقع پر گفتگو کرتے ہوئے رانا مشہود احمد خاں نے کہا کہ ا ن کا این پی سی کا یہ پہلا دورہ ہے، یہاں آکر بہت اچھا محسوس ہو رہا ہے، این پی سی کی قیادت کے ساتھ مل کر مستقبل میں بھی مزید چیزوں پر بھی کام کریں گے۔ انہوں نے کہا کہ پاک بھارت حالیہ جنگ کے دوران پاکستانی میڈیا کا کردار نہایت شاندار رہا ہے،بھارت نے گودی میڈیا کے ذریعے دنیا کو جھوٹی خبریں دے کر بیوقوف بنانے کی کوشش کی مگر پاکستانی میڈیا کی بروقت اور حقیقت پر مبنی رپورٹنگ کے باعث بھارت کو دنیا کے سامنے بے نقاب کرنے میں مدد ملی۔انہوں نے کہا کہ پاک بھارت معرکہ کے بعد پاکستان عالمی سطح پر ایک نئے روپ میں سامنے آ رہا ہے اور دنیا پاکستان کے ساتھ کھڑے ہونے میں فخر محسوس کر رہی ہے جس کی واضح مثالیں وزیراعظم اور آرمی چیف کی چین اور سعودی عرب کے دوروں میں شاندار پذیرائی ہے۔انہوں نے مزید کہا کہ وزیر اعظم یوتھ پروگرام کےتحت نوجوانوںکی صحت، مستقبل ، کاروبار اور کھیلوں کے حوالے سے اہم اقدامات اٹھائے جا رہے ہیں ،نوجوانوں کو لیپ ٹاپ دیئے جائیں گے،ای کامرس میں پاکستان دنیا میں چوتھے نمبر پر ہے۔ایک سوال کے جواب میں رانا مشہود احمد خاں کا کہنا تھا کہ کے پی ایل ہو یا پی ایس ایل ہمارا کام ملک کے ٹیلنٹ کو سامنے لانا ہے،بچوں کی تربیت کیلئے اکیڈمیز اور
لیب بنا چکے ہیں، ملک میں کھیلوں کے معیار کو بہتر بنانے اور عالمی سطح پر میڈلز جیتنے کیلئے 23 کھیلوں کو منتخب کیا ہے یہ وہ کھیل ہیں جو اولمپیکس میں شامل ہیں۔ انہوں نے مزید کہا کہ پاکستان کوہم سب مل کر مضبوط سے مضبوط تربنائیں گے اور الگ وطن بنانے کا اصل مقصد حاصل کرکے ہی دم لیں گے۔
وزیراعظم یوتھ پروگرام کے چیئرمین رانا مشہود احمد خاں کا نیشنل پریس کلب اسلام آباد کا دورہ :نئے تزئین شدہ این پی سی سپورٹس روم کا افتتاح
