وزیراعلیٰ مریم نواز شریف کی عید میلادالنبی ؐ کے بابرکت موقع پرامت مسلمہ کو دل کی گہرائیوں سے مبارکباد

لاہور( نمائندہ خصوصی) عید میلادالنبیؐ پر وزیراعلیٰ پنجاب مریم نواز شریف نے اپنے پیغام میں کہاکہ سلام ان پر جو رحمت للعالمین ہیں۔سلام ان پر جو وجہ تخلیق کائنات ہیں۔ سلام ان پر جو فخر موجودات ہیں۔ وزیراعلیٰ مریم نواز شریف نے عید میلادالنبی ؐ کے بابرکت موقع پرامت مسلمہ کو دل کی گہرائیوں سے مبارکباد دی ہے اور کہاکہ عید میلاد النبی ؐپوری امت مسلمہ کیلئے خوشی کا پیغام ہے۔وزیراعلی مریم نوازشریف نے کہاکہ نبی کریم ؐ کی دنیا میں تشریف آوری پوری کائنات کیلئے باعث رحمت و سعادت ہے۔آپؐ کی تعلیمات نے بنی نوع انسانیت کو اندھیروں سے اوج ثریا تک پہنچا دیا۔ حضور پاکؐ کی تعلیمات پر عمل پیرا ہونے میں ہی ہر کامیابی پنہاں ہے۔ وزیراعلی مریم نواز شریف نے کہاکہ حضور نبی اکرمؐ نے امن وآشتی، احترام انسانیت، مساوات، عفو و درگزر اور عدل و انصاف کا درس دیاہے۔حضوراکرمؐ کی تعلیمات پر عمل پیرا ہو کر معاشرے سے ظلم، زیادتی، ناانصافی اوربدامنی کا خاتمہ ممکن ہے۔ نبی اکرم حضرت محمدؐ کی محبت کا تقاضا ہے کہ ہم اپنے اختلافات کو مفاہمتی حکمت عملی کی روشنی میں حل کر یں۔وزیراعلی مریم نوازشریف نے کہاکہ نبی کریمؐ کی زندگی قرآن کی عملی تفسیر ہے۔ریاست اور سیاست دونوں کی کامیابی صرف اسی وقت ممکن ہے جب سیرتِ طیبہؐ کی اتباع کی جائے۔ لازم ہے ہم اپنی انفرادی اور اجتماعی زندگی کو حضورؐ کے اسوہ حسنہ کے مطابق بنائیں۔