وزیر اعلیٰ مریم نواز شریف جھنگ کے نواحی تریموں بیراج پہنچ گئیں، سیلابی پانی کی صورتحال کا جائزہ لیا

لاہور( نمائندہ خصوصی) وزیر اعلیٰ پنجاب مریم نواز شریف جھنگ کے نواحی تریموں بیراج پہنچ گئیں۔وزیر اعلیٰ مریم نواز شریف نے سیلابی پانی کی صورتحال کا جائزہ لیا۔وزیر اعلیٰ مریم نواز شریف کو سکاڈا کنٹرول روم میں سیلاب کی صورتحال پر بریفنگ دی گئی۔کمشنر فیصل آباد راجا جہانگیر انور اور ڈپٹی کمشنر علی اکبر نے بریفنگ دی۔بریفنگ میں بتایا گیاکہ تریموں بیراج سے تاریخ کا سب سے بڑا ریلا گزرا۔ بروقت اقدامات سے ناصرف ملتان بلکہ دیگر علاقے بھی نقصانات سے محفوظ رہے۔جھنگ میں سیلاب سے پہلے دو لاکھ 98ہزار آبادی کا انخلاء ہوا۔جھنگ میں تقریباً ایک لاکھ 19ہزار کے لگ بھگ مویشیوں کوسیلابی ریلے کی آمد سے پہلے محفوظ مقامات پر منتقل کیا گیا۔ بریفنگ میں مزید بتایاگیا کہ مویشیوں کے لئے چارہ اور ونڈا وغیرہ دیا جارہا ہے۔102لائیو سٹاک ورکر گاؤں گاؤں جاکر مویشیوں کی دیکھ بحال اور علاج معالجہ کررہے ہیں۔ ضلع جھنگ میں سیلاب متاثرین کے لئے 21ریلیف کیمپ قائم، تقریباً750 متاثرین مقیم ہیں۔ سیلاب سے جھنگ کے 181 موضع متاثرہ ہوئے۔ وزیر اعلیٰ مریم نواز شریف نے آخری فرد تک ریسکیو آپریشن کے دائرہ کار بڑھانے کی ہدایت کی ہے۔وزیر اعلیٰ مریم نواز شریف نے سیلاب متاثرین کی تلاش کے لئے ڈرون، تھرمل امیجنگ کیمرے اور دیگر جدید ٹیکنالوجی کا استعمال میں لانے کا حکم دیا ہے۔انہوں نے کہا کہ جہاں مدد کی ضرورت ہے، وہاں امداد پہنچائیں گے،جھنگ کی محرومیاں ختم کریں گے۔اللہ تعالیٰ نے عوام کے تحفظ کی ذمہ داری دی،کسی بھی جگہ حفاظتی بندتوڑنے کے ٹیکنیکل کام میں مداخلت نہیں کی۔آبادی کوسیلاب سے بچانا اور انسانی جانوں کو محفوظ رکھنا میری سب سے پہلی ترجیح ہے۔ ہر صورت میں انسانی آبادی کو بچانے کو ترجیح دی گی اور دی جائے گی۔کمشنر فیصل آباد راجاجہانگیرانور، ڈپٹی کمشنر علی اکبر اور پوری ٹیم نے بڑی محنت سے کام کیا،اپنی ٹیم پر فخر ہے۔