چینی وزیر خارجہ وانگ ژی پاکستان کے تین روزہ دورے پر اسلام آباد پہنچ گئے،نائب وزیراعظم اسحاق ڈار نے نور خان ایئربیس پر معزز مہمان کا استقبال کیا

اسلام آباد۔(نمائندہ خصوصی):چینی وزیر خارجہ وانگ ژی پاکستان کے تین روزہ دورے پر اسلام آباد پہنچ گئے، نائب وزیراعظم و وزیر خارجہ سینیٹر محمد اسحاق ڈار نے نور خان ایئربیس پر معزز مہمان کا استقبال کیا۔بدھ کو ترجمان دفتر خارجہ کی جانب سے جاری بیان کے مطابق نائب وزیراعظم و وزیر خارجہ سینیٹراسحاق ڈار کے ہمراہ وزارت خارجہ اور پاکستان میں چینی سفارت خانہ کے اعلیٰ حکام بھی موجود تھے۔ پاکستان کے روایتی لباس میں ملبوس بچوں کے گروپ نے معزز مہمان کا خیر مقدم کیا اور پھول پیش کئے۔دورے کے دوران چینی وزیر خارجہ اسلام آباد میں منعقد ہونے والے چھٹے پاک – چین وزرائے خارجہ سٹریٹجک ڈائیلاگ میں شرکت کریں گے۔ چینی وزیر خارجہ وانگ ژی نائب وزیراعظم و وزیر خارجہ اسحاق ڈار کی دعوت پر پاکستان آئے ہیں۔ چینی وزیر خارجہ اسلام آباد میں پاک – چین سٹریٹجک ڈائیلاگ کے چھٹے دور میں اپنے ملک کی نمائندگی کریں گے جبکہ نائب وزیراعظم و وزیر خارجہ اسحاق ڈار کے ہمراہ پاک – چین سٹریٹجک ڈائیلاگ کی مشترکہ صدارت بھی کریں گے۔