جنوبی افریقہ میں مقیم پاکستانی کاروباری شخصیت تبسم پردیسی کی پاکستان میں مائننگ سرمایہ کاری میں دلچسپی

اسلام آباد۔(نمائندہ خصوصی):جنوبی افریقہ میں مقیم معروف پاکستانی کاروباری شخصیت تبسم پردیسی نےپاکستان میں مائننگ کے شعبہ میں سرمایہ کاری میں دلچسپی کا اظہار کیا ہے۔ انہوں نے منگل کو اسلام آباد میں منعقدہ پاکستان مائننگ سمٹ 2025 میں شرکت کی جو پاکستان کے معدنیات اور توانائی کے شعبوں میں ایک انقلابی پیش رفت کی عکاس ہے۔ یہ اعلیٰ سطحی کانفرنس ملکی و غیر ملکی پالیسی سازوں، عالمی سرمایہ کاروں اور صنعتی رہنماؤں کو پاکستان کے معدنی وسائل کے وسیع اور غیر استعمال شدہ مواقع پر تبادلہ خیال کا موقع فراہم کر رہی ہے۔جنوبی افریقہ کی ایئرلائن "اسکائی وائز” کی شریک بانی تبسم پردیسی جو ممتاز کاروباری خاتون ہیں، اب تھر کول فیلڈز میں کوئلے سے گیس بنانے والے جدید پلانٹ کے قیام کے لئے ایک بڑی سرمایہ کاری مہم کی قیادت کر رہی ہیں۔ یہ منصوبہ جنوبی افریقہ کی معروف مائننگ کمپنیوں کے اشتراک سے عمل میں لایا جا رہا ہے، جس کا مقصد پاکستان میں توانائی کے شعبے کو جدید خطوط پر استوار کرنا، درآمدی ایندھن پر انحصار کم کرنا اور علاقائی معیشت کے لئے دیرپا مواقع پیدا کرنا ہےتبسم پردیسی، منصوبے کی تفصیلی تجویز پہلے ہی متعلقہ حکام کو جمع کرا چکی ہیں اور اب وہ کانفرنس کے دوران ایک مؤثر لابنگ اور روابط سازی کی مہم چلا رہی ہیں تاکہ اعلیٰ سطحی سرکاری و نجی شراکت داری حاصل کی جا سکے، قوانین و ضوابط کی راہ ہموار کی جا سکے اور منصوبہ قومی توانائی و ماحولیاتی پالیسی سے ہم آہنگ ہو۔انہوں نے کانفرنس کے افتتاحی دن کہاکہ "پاکستان کے پاس ایک عالمی مائننگ پاور بننے کی بھرپور صلاحیت موجود ہے۔یہاں وسائل وافر ہیں، افرادی قوت نوجوان اور باصلاحیت ہے،ضرورت صرف وژن اور عملی اقدامات کی ہے، اور میں اسی مشن کے لئے یہاں ہوں۔ان کی یہ کوشش بیرون ملک مقیم پاکستانیوں کی سرمایہ کاری کا ایک ماڈل تصور کی جا رہی ہے، جس میں وہ نہ صرف سرمایہ لاتے ہیں بلکہ عالمی مہارت، جدت اور اعتماد بھی ملک کے اہم شعبوں میں لے کر آتے ہیں۔