”فری عافیہ -یوم آزادی ریلی “میں بھرپور شرکت کریں: ڈاکٹر فوزیہ صدیقی

کراچی (نمائندہ خصوصی ) گلوبل عافیہ موومنٹ کی جانب سے 77 ویں یوم آزادی کے موقع پر13 اگست، منگل کی رات 10بجے فائیواسٹار چورنگی، نارتھ ناظم آباد پر ”فری عافیہ -یوم آزادی ریلی “کا انعقاد کیا جائے گا۔ عافیہ موومنٹ میڈیا سیل سے جاری کردہ پریس ریلیز کے مطابق گلوبل عافیہ موومنٹ کی چیئرپرسن ڈاکٹر فوزیہ صدیقی کی ہدایات پراس سال بھی یوم آزادی جوش و خروش سے منایا جائے گا۔انہوں نے عوام سے اپیل کی ہے کہ ریلی میں بھرپور شرکت کریں۔اس ریلی کی بنیادی تھیم ”آزادی کو عزت دو… بیٹی کو رہا کراﺅ“ ہے۔ عافیہ موومنٹ سیکریٹریٹ سے ریلی میں شرکت کے دعوت نامہ ارسال کردیئے گئے ہیں۔ مختلف سیاسی، دینی ، سماجی، مزدور، طلباءاور انسانی حقوق کی جماعتوں کے رہنماءریلی میں کارکنان سمیت بھرپور شرکت کی یقین دہانی کرا رہے ہیں۔ ”فری عافیہ -یوم آزادی ریلی “ کے انعقاد کا مقصد ”آزادی نعمت ہے“ کا شعورقوم میں اجاگر کرنا ہے۔ یوم آزادی کی شب شہر کے مختلف علاقوں سے ”فری عافیہ -یوم آزادی ریلی “کے شرکاءفائیو اسٹار چورنگی پر جمع ہوں گے، ٹھیک بارہ بجے قومی ترانہ پڑھا جائے گا اور ملک کی ترقی اور سلامتی کے لیے خصوصی دعاﺅں کا اہتمام کیا جائے گا۔